Kʼeʼex u kuxtaloʼob tumen le Bibliaoʼ

JUNTÚUL máakeʼ suuk kaʼach u yookol yéetel u apostar. ¿Baʼax áant utiaʼal u kʼexik u kuxtal? Koʼox ilik baʼax ku yaʼalik.

«Uts tin wich kaʼach in chaʼantik u carrerail tsíimin» (RICHARD STEWART)

SÍIJ TU AÑOIL: 1965

TUʼUX SÍIJI: JAMAICA

KAʼACHEʼ: KU YOOKOL YÉETEL YAʼAB U APOSTAR

BIX KUXLIKEN KAʼACHI: Líikʼen tu kaajil Kingston, tu luʼumil Jamaica. Teʼeloʼ jach yaʼab máak kajaʼaniʼ, yaʼab máak óotsiloʼob yaniʼ, minaʼan meyajiʼ yéetel jach yaʼab máak kʼasaʼan yaniʼ. Le máakoʼoboʼ saajkoʼob tumen yaʼab maleanteʼob yaniʼ, sáamsamal ku yuʼubaʼal bix u tsʼonkuba le máakoʼoboʼ.

In maama kaʼacheʼ jach ku kíimskuba meyaj utiaʼal u tsʼáaik baʼax kʼaʼabéet tiʼ teen bey xan tiʼ kaʼatúul in wíitsʼinoʼob. Letiʼ kaʼacheʼ jach kʼaʼanaʼan u yilik ka xiʼikoʼon xook, chéen baʼaleʼ teneʼ maas jatsʼuts in wilik kaʼach u carrerail le tsíiminoʼoboʼ. Maʼ uts tin tʼaan kaʼach in bin xookiʼ le beetik tu lugar in bin xookeʼ kin bin tuʼux ku beetaʼal le carreraʼoboʼ. Hasta kʼuchen in natʼ jujuntúul tiʼ le tsíiminoʼoboʼ.

Maʼ xáanchaj ka viciochajten in apostariʼ, pʼáaten mujeriegoiʼ yéetel káaj in tsʼuʼutsʼik marihuana. Utiaʼal u páajtal u seguer in kuxtal beyoʼ káaj in wookol yéetel anchajten yaʼab tsʼoonoʼob. Yaaske mix máak tin kíimsaj le táan in wookoloʼ.

Ka máan kʼiineʼ tu chuken le policíaʼoboʼ ka tu kʼalenoʼob cárcel. Chéen baʼaleʼ le ka jóokʼeneʼ káaj in kaʼa bisik le kuxtal yaanten kaʼachoʼ, hasta maas kʼaschaji. Kex bey jach inocente in wilaʼaleʼ u jaajileʼ jach tercoen, séeb in tsʼíikil yéetel jach kʼasaʼanen kaʼachi. Chéen tin woʼolal kin tuukul.

BIX TU KʼEXIL IN KUXTAL LE BIBLIAOʼ: Teʼ kʼiinoʼob jach kʼaschajaʼan in kuxtaloʼ káaj u xook in maama yéetel u testigoʼob Jéeoba. Como tin wilaj jatsʼutschaj u modos in maamaeʼ taakchaj in wojéeltik baʼax áante, le beetik káaj xan in xook yéetel le Testigoʼoboʼ.

Tu séebaʼanil tin tsʼáaj cuentaeʼ letiʼobeʼ maʼ beyoʼob jeʼex u maasil religiónoʼoboʼ tumen tuláakal le baʼax ku kaʼanskoʼoboʼ teʼ Biblia ku jóoʼskoʼoboʼ. Chéen letiʼob kin wilik u máanoʼob kaʼansaj joonaj joonajil jeʼex u beetik le cristianoʼob kaʼachoʼ (Mateo 28:19; Hechos 20:20). Pero le baʼax maas eʼesten letiʼob u jaajil religióneʼ letiʼe yaabilaj ku yeʼesik tu baatsiloʼoboʼ (Juan 13:35).

Jeʼex u bin in kaanbal tiʼ le Bibliaoʼ tin tsʼáaj cuenta yaʼab baʼal unaj in kʼexik ichil in kuxtal. Tin kaneʼ Jéeobaeʼ jach u pʼeek u núupkʼebantal máak, tsʼoʼoleʼ wa in kʼáat in beet baʼax u kʼáateʼ kʼaʼabéet kaʼach in limpiokíintik in kuxtal (2 Corintios 7:1; Hebreos 13:4). Jach kʼuch tin puksiʼikʼal le ka tin kaneʼ yéetel le baʼaxoʼob kin beetkoʼ jeʼel in kiʼimakkúuntik u yóol Jéeobaeʼ wa jeʼel in lúuʼsik u yóoleʼ (Proverbios 27:11). Le oʼolal tin chʼaʼtuklaj u xuʼulul in tsʼuʼutsʼik marihuana, u xuʼulul u yantal in tsʼoon yéetel tin chʼaʼtuklaj in jatsʼutskíintik in modos. Pero le baʼax maas istikyaj tin wilil in pʼatkoʼ letiʼe in máan yéetel yaʼab koʼoleloʼoboʼ bey xan in apostar.

Tu káajbaleʼ maʼ taak kaʼach in waʼalik tiʼ in amigoʼob táan in xokik le Biblia yéetel le Testigoʼoboʼ. Chéen baʼaleʼ tin kʼexaj in tuukul le ka tin xokaj le baʼax ku yaʼalik Mateo 10:​33, teʼeloʼ Jesúseʼ tu yaʼalaj: «Jeʼel máaxak ka u yaʼal maʼ u kʼaj óolen tu táan le máakoʼoboʼ, teen xaneʼ yaan in waʼalik maʼ in kʼaj óol tu táan in Taata yaan teʼ kaʼanoʼ». Ka tsʼoʼok in xokik le tekstoaʼ tu séebaʼanil tin waʼalaj tin in amigoʼob le baʼax kin beetkoʼ. Letiʼobeʼ jach jaʼakʼ u yóoloʼob tumen maʼ tu páajtal u creerkoʼob wa juntúul máak jach u beetmaj baʼaloʼob kʼaastakeʼ taak u meyajtik Dios. Kex beyoʼ teneʼ tin waʼalajtiʼob tsʼoʼok in chʼaʼtuklik in kʼexik in kuxtal.

UTSILOʼOB TSʼOʼOK U TAASIKTEN: In maamaeʼ jach kiʼimakchaj u yóol le ka tu yilaj táan in tsʼáaik ichil in kuxtal le baʼax kin kanikoʼ. Bejlaʼeʼ maʼ chiʼichnak yoʼolal le baʼaxoʼob kin beetkoʼ. Tsʼoʼoleʼ tu kaʼatúulaloʼon jach uts t-tʼaan k-tsikbal yoʼolal le yaabilaj k-uʼuyik tu yoʼolal Jéeobaoʼ. Yaan kʼiineʼ le kéen in kʼaʼajs bix in kuxtal kaʼacheʼ hasta maʼ tin creertik tuláakal le kʼeexoʼob tsʼoʼok in beetkoʼ. Bejlaʼeʼ maʼ tin tsʼíiboltik in núupkʼebantal mix in ayikʼaltal.

Wa maʼ in kaanbal yoʼolal Jéeobaeʼ bejlaʼa kʼalaʼanen cárceleʼ wa bejlaʼa úuch kíimsaʼakeneʼ. Chéen baʼaleʼ úuchik in kaanbal yoʼolal le Bibliaoʼ bejlaʼeʼ kiʼimak in wóol yéetel in familia, in wataneʼ yaʼab u yáantken yéetel in hijaeʼ jach ku yuʼubik tʼaan. Jach kiʼimak k-óol ikil k-meyajtik Jéeoba. Kin tsʼáaik u graciasil úuchik u kaʼansaʼalten baʼax ku yaʼalik le Bibliaoʼ, le oʼolal bejlaʼeʼ tiʼ jeʼel baʼalak súutukileʼ kin tsikbaltik le baʼax tsʼoʼok in kanikoʼ. Kin tsʼáaik u graciasil tiʼ Jéeoba úuchik u natsʼken tu yiknal bey xan úuchik u kʼamken ichil u kaajal.

[Uláakʼ baʼax ku tsoʼolol]

«Jach kʼuch tin puksiʼikʼal le ka tin kaneʼ yéetel le baʼaxoʼob kin beetkoʼ jeʼel in kiʼimakkúuntik u yóol Jéeobaeʼ wa jeʼel in lúuʼsik u yóoleʼ»

[Oochel]

Teen, in watan yéetel in hija

[Oochel]

Tin wilaj jatsʼutschaj u modos in maama, le oʼolal taakchaj in wojéeltik baʼax áante