U MILLONESIL u testigoʼob Jéeobaeʼ maʼatech u festejarkoʼob le Navidadoʼ. ¿Ku yaatal wa túun u yóoloʼob ikil maʼatech u festejarkoʼob? Kux túun u paalaloʼob, ¿bix u yuʼubikubaʼob ikil maʼ tu festejarkoʼob le Navidadoʼ? Koʼox ilik baʼax ku yaʼalik jujuntúul u testigoʼob Jéeoba jejeláas tuʼux u taaloʼob.

U kʼaʼajsaʼal Jesús: «Antes tiʼ in beetkinba u testigo Jéeobaeʼ óoliʼ maʼatech in bin iglesia. Wa kin bin kaʼacheʼ chéen utiaʼal Navidad wa Semana Santa, yaan horaeʼ hasta maʼatech in bin. Chéen baʼaleʼ mix teʼ kʼiinoʼob kin kʼaʼajsik Jesúsoʼ. Teʼ kʼiinoʼobaʼ kex maʼatech in festejartik Navidadeʼ kin muchʼkinba yéetel u testigoʼob Jéeoba kaʼatéen ichil junpʼéel semana, tsʼoʼoleʼ kin kaʼansik tiʼ le máakoʼob baʼax ku yaʼalik le Biblia yoʼolal Jesúsoʼ» (EVE, AUSTRALIA).

U siʼibil wa baʼax: «Jach ku kiʼimaktal in wóol kéen siʼibikten wa baʼax kex maʼ táan in páaʼtikiʼ. Tsʼoʼoleʼ uts tin wich in beetik mejen tarjetaʼob yéetel dibujoʼob utiaʼal in síik tiʼ u maasil, leloʼ ku beetik u kiʼimaktal in wóol yéetel letiʼob xaneʼ ku kiʼimaktal u yóoloʼob» (REUBEN, IRLANDA DEL NORTE).

U yáantaʼal u maasil: «Toʼoneʼ jatsʼuts k-ilik k-beetik janal utiaʼal k-bisik tiʼ le máaxoʼob kʼojaʼanoʼoboʼ. Yaan horaeʼ k-bisiktiʼob junpʼéel postre, looloʼob wa junpʼéel chan regalo utiaʼal u kiʼimaktal u yóoloʼob. Jatsʼuts k-ilik k-beetik beyoʼ tumen junpʼéel baʼal ku páajtal u beetik máak tiʼ jeʼel baʼalak kʼiineʼ» (EMILY, AUSTRALIA).

U muchʼkuba máak yéetel u láakʼtsiloʼob: «Le kéen u muchʼuba máak yéetel u láakʼtsiloʼobeʼ, le paalaloʼoboʼ maases ku páajtal u kʼaj óoltikoʼob u tíoʼob, u abueloʼob yéetel u primoʼob. K-láakʼtsiloʼobeʼ u yojloʼobeʼ maʼatech k-festejartik le fiestaʼob suuk u beetik le máakoʼoboʼ. Letiʼobeʼ u yojloʼobeʼ k-xíimbaltikoʼob tumen k-yaabiltmoʼob maʼ tumen táan k-obligartaʼaliʼ» (WENDY, ISLAS CAIMÁN).

U yantal jeetsʼelil: «Utiaʼal Navidadeʼ jach yaʼab baʼaloʼob kin beetik kaʼachi, le oʼolal maʼ tu máan tin tuukul u yantal jeetsʼelil. Tsʼoʼok in kanik baʼax ku prometertik Dios, yéetel leloʼ tsʼoʼok u beetik u yantalten jeetsʼelil. Tsʼoʼoleʼ tsʼoʼok in kanikeʼ in paalaleʼ yaan u kuxtaloʼob utiaʼal mantatsʼ tiʼ junpʼéel jatsʼuts paraíso» (SANDRA, ESPAÑA).