Sukuʼuneʼex yéetel kiikeʼex:

Teʼ siglo siete táanil tiʼ u taal Jesusoʼ, tiʼ le profeta Ezequieloʼ tsʼaʼab u yil junpʼéel náay. Ichil le náayoʼ tu yilaj junpʼéel nojoch baʼal yaan u ruedasil, junpʼéel carro yaan teʼ kaʼanoʼ. Le máax nuʼuktikoʼ Jéeoba, u maas nojchil tuláakal baʼal. Le baʼax beetik u maas jaʼakʼal u yóol máakoʼ letiʼe bix séebil u binoʼ, jeʼex u léembal le cháakoʼ. Tsʼoʼoleʼ kex ka u kʼex u tojil tuʼux ku bineʼ láayliʼ séeb u péekeʼ yéetel maʼ kʼaʼabéet u sutkuba táanxel tuʼuxiʼ (Eze. 1:4, 9, 12, 14, 16-27).

Le baʼax tsʼaʼab u yil Ezequieloʼ ku kʼaʼajsiktoʼoneʼ mantatsʼ táan u péek u jaats u kaajal Jéeoba yaan teʼ kaʼanoʼ. ¿Kux túun le u jaats yaan way Luʼumoʼ? Teʼ jaʼab máanikoʼ t-ilaj bix séebaʼanil xan u péek u jaats u kaajal Jéeoba yaan way Luʼumeʼ.

Way Estados Unidoseʼ, le máaxoʼob ku meyajoʼob Betel tu noj kaajil Brooklynoʼ yaʼab meyaj anchaj u beetkoʼob utiaʼal u binoʼob kajtal teʼ túumben sede mundial yaan Warwickoʼ (Nueva York) bey xan tuláakʼ edificioʼoboʼ; uláakʼoʼobeʼ binoʼob áantaj táanxel tuʼuxoʼob. Tiʼ uláakʼ sucursaloʼobeʼ le betelitaʼoboʼ yaʼab meyaj táan u beetkoʼob xan tiʼ construcción, utiaʼal u maas maʼalobkíintaʼal u najil Betel, tiʼ u muʼuchʼul sucursaloʼob wa utiaʼal u binoʼob kajtal táanxel tuʼux. ¿Kux túun teech? Maʼ xaaneʼ kex maʼ binech kajtal táanxel tuʼuxeʼ k-ojel yaʼab meyaj táan xan a beetik.

Le sukuʼunoʼob tiʼ le Cuerpo Gobernanteoʼ jach ku kiʼimaktal u yóoloʼob yéetel ku líikʼil u yóoloʼob ken u yiloʼob le meyaj táan a beetkeʼexoʼ tumen táan a múul bineʼex yéetel u kaajal Jéeoba. Mix juntéen ilaʼak u beetaʼal le bukaʼaj meyajaʼ. Yaʼab sukuʼunoʼobeʼ tsʼoʼok u binoʼob kajtal tuʼux maas kʼaʼabéet áantaj wa táan xan u kankoʼob uláakʼ idioma. Uláakʼoʼob xaneʼ táan u kʼaʼaytajoʼob tiʼ junpʼéel forma mix juntéen u beetoʼob. Yanoʼob xaneʼ jejeláas bix táan u tsʼáaik u yóoloʼob u maas meyajtoʼob Jéeoba. Bey xan le sukuʼunoʼob tsʼoʼok u yantal u jaʼabiloʼob wa le kʼojaʼanoʼoboʼ maʼ tu xuʼulul u yáalkaboʼob tu bejil le kuxtaloʼ. Letiʼobeʼ táan u múul meyajoʼob yéetel u kaajal Jéeoba yéetel táan u yeʼeskoʼob maʼ jaaj baʼax ku yaʼalik le Kʼaasilbaʼaloʼ (1 Cor. 9:24).

Kʼaʼajakteʼexeʼ Jéeobaeʼ maʼ ken u tuʼubs le meyaj ka beetkeʼexoʼ (Heb. 6:10). Le jatsʼuts modos ka weʼeskeʼexoʼ ku kʼaʼajsiktoʼon Abrahán yéetel Sara. Le yaan maas tiʼ 70 años tiʼ Abrahanoʼ, lukʼ tu kaajil Ur tu luʼumil le caldeoʼoboʼ ka bin junmúuchʼ yéetel u familia tak tu luʼumil Canaán, tuʼux kajlaj uláakʼ 100 años chéen ichil pasel nookʼoʼobiʼ. ¡Jach túun jatsʼuts le modos tu yeʼesoʼob Abrahán yéetel Saraoʼ! (Gén. 11:31; Bax. 7:2, 3.)

¿Techeʼ bey wa le modos ka weʼesikoʼ? Teʼ tu tsʼook kʼiinoʼobaʼ tsʼoʼok a weʼeskeʼex chúukaʼan a wóoleʼex  tumen láayliʼ táan a beetkeʼex le baʼax tu yaʼalaj Jesusoʼ: «Le oʼolaleʼ, xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob, táan a tsʼáaikeʼex u yokjaʼob tu kʼaabaʼ le Taataoʼ, le Paaloʼ yéetel le kiliʼich muukʼoʼ» (Mat. 28:19).

Le ka tu yaʼalaj Jesús le tʼaan «xeeneʼex[oʼ]» tu tsʼáaj naʼatbil unaj k-péek wa k-tsʼáaik k-óol k-beet wa baʼax. Jach ku kiʼimaktal k-óol k-ilik bix tu tsʼáajil u yóoloʼob meyaj le máaxoʼob tsaypachtik Cristo le año máanikoʼ. Chíikaʼan u yilaʼaleʼ Jéeobaeʼ táan u bendecirtik le meyaj k-beetik utiaʼal u maas kʼaʼaytaʼal u maʼalob péektsilil le Reino tiʼ tuláakal yóokʼol kaaboʼ (Mar. 13:10).

Yaʼab máakoʼobeʼ táan u kʼamkoʼob le maʼalob péektsiloʼ. Le año máanikoʼ le j-kʼaʼaytajoʼoboʼ náak 8,340,847 u túulaloʼob. U promedioil le xookoʼob tsʼaʼab cada mesoʼ 10,115,264 u pʼéelal. Jeʼex k-ilkoʼ u carro Jéeobaeʼ mantatsʼ táan u péek yéetel teʼexeʼ bey xan a beetkeʼexoʼ. Seguernakeʼex yéetel le maʼalob meyaj táan a beetkeʼexoʼ tumen maʼ yaʼab u bin u kʼaʼalal le joonaj ku bisik máak tiʼ salvacionoʼ.

Le oʼolaleʼ jach maʼalob le teksto utiaʼal u jaʼabil 2017: «Kʼub a wóol tiʼ Jéeoba, beet baʼax maʼalob» (Sal. 37:3). Ken a beeteʼex le baʼax ku yaʼalik le tekstoaʼ, ka weʼeskeʼex a kʼubmaj a wóoleʼex tiʼ Jéeoba. Kʼaʼajakteʼexeʼ maʼ ta juunal yaneʼexiʼ. Le baʼax tu yaʼalaj Jesusoʼ yaan u béeytal: «¡Ileʼex!, tiʼ yanen ta wéeteleʼex tak teʼ kʼiinoʼob táan u kʼuchul u xuul yóokʼol kaaboʼ» (Mat. 28:20).

Maʼ u tuʼubulteʼexeʼ Jéeobaeʼ mantatsʼ ken u bendecirt le meyaj ka beetkeʼexoʼ. Kex junpʼíit wa kex yaʼab le meyaj ka beetkeʼexoʼ, le baʼax kiʼimakkúuntik u yóol Jéeobaoʼ letiʼe a meyajtikeʼex yéetel tuláakal a puksiʼikʼaleʼexoʼ. Tuláakal le baʼax ka beetkeʼex utiaʼal a meyajtikeʼexoʼ ku lúubul utsil tiʼ yéetel ku beetik u kiʼimaktal u yóol (2 Cor. 9:6, 7). Maʼ u xuʼulul a orareʼex, a xokikeʼex le Bibliaoʼ, a bineʼex muchʼtáambal yéetel a jóokʼleʼex kʼaʼaytaj, beyoʼ yaan a maas natsʼkabaʼex tiʼ Jéeoba k-Taata, le máax jach u yaabiltmoʼonoʼ.

Beoraaʼ «chéen junpʼíit kʼiin pʼaatal» tiʼ le Kʼaasilbaʼaloʼ, le oʼolal táan u beetik tuláakal le ku páajtal utiaʼal u náachkuntkoʼon tiʼ Jéeoba yéetel maʼ u chúukpajal k-óol tiʼ letiʼ (Apo. 12:12). Pʼáateneʼex naatsʼ tiʼ Jéeoba, beyoʼ kex jeʼel baʼaxak ka u beet le Kʼaasilbaʼaloʼ maʼ tan lúubleʼex tiʼ baʼax kʼaas (Sal. 16:8). Maʼ u tuʼubulteʼex k-yaabiltmeʼex yéetel kiʼimak k-óol ikil a wáantkoʼoneʼex k-kanáant le baʼaxoʼob utiaʼal u Yuumil le Reino teʼ tu tsʼook kʼiinoʼobaʼ.

A sukuʼuneʼex,

Cuerpo Gobernante tiʼ u j-Jaajkunajoʼob Jéeoba