Chéen ocho máakoʼob maʼ kíimoʼob teʼ Búulkabaloʼ, baʼaleʼ ka máan kʼiineʼ kaʼa yaʼabchaj máakoʼob teʼ luʼumaʼ. Bey túunoʼ, trescientos cincuentai dos jaʼaboʼob tsʼoʼokok le Búulkabaloʼ ka síij Abraham. Dioseʼ tiaʼalaj tiʼ Abraham yaan u yantal utúul u paal, Isaac ken u tsʼáa u kʼaabaʼte, yaan k-ilik bix béeychajik. Tiʼ u kaʼatúul paalal Isaaqueʼ, Jacob yéeyaʼab tumen Dios.

Jacobeʼ yaʼabchaj u láakʼtsilil: Tiʼ tuláakal u paalaleʼ doce utúulul u xiibil yéetel jujuntúul xan u koʼolelil. Diez tiʼ u paalal Jacobeʼ tu pʼektoʼob José, u yíitsʼnoʼob, le oʼolaleʼ tu konoʼob utiaʼal ka palitsiltaʼak Egipto. Ka máan kʼiineʼ, Joseiʼ kʼuch u beetuba utúul u nojoch jalaʼachil Egipto. Le ka yanchaj upʼéel nojoch wiʼijileʼ, Joseiʼ tiʼ tu yilaj wa láayliʼ kʼasaʼan u sukuʼunoʼoboʼ. Ka tsʼoʼokeʼ tuláakal u láakʼtsilil Jacob, le israelitaʼoboʼ, binoʼob Egipto. Lelaʼ úuch doscientos noventa jaʼaboʼob síijik Abraham.

Ichil le uláakʼ doscientos quince jaʼaboʼoboʼ le israelitaʼoboʼ kajlajoʼob Egipto. Ka tsʼoʼok u kíimil Joseiʼ, letiʼobeʼ palitsiltaʼaboʼob Egipto. Ku máan kʼiineʼ síij Moisés, letiʼ yéeyaʼab tumen Dios utiaʼal u jóoʼsik le israelitaʼob Egiptooʼ. Tuláakaleʼ, ochocientos cincuentai siete jaʼaboʼob tiʼ tsikbalil yaan ichil le KAʼA Jaatsaʼ.