¿TÁAN wa wilik máaxoʼob ku bin u xíimbalt Dina? Táan u bin u xíimbalt le x-chʼúupalal kajaʼanoʼob tu luʼumil Canaanoʼ. ¿Lelaʼ jeʼel wa u kiʼimakkúuntik yóol u taataeʼ? Wa ka kʼaʼajs baʼax ku tuklik kaʼach Abraham yéetel Isaac tiʼ le x-canaaneaʼoboʼ jeʼel u yáantkech a núuk le kʼáatchiʼaʼ.

¿U kʼáat wa kaʼach Abraham ka tsʼoʼokok u beel Isaac yéetel utúul x-canaanea? Maʼatech. ¿U kʼáatoʼob wa kaʼach xan Isaac yéetel Rebeca ka tsʼoʼokok u beel Jacob yéetel utúul x-canaanea? Maʼatech xan. ¿A wojel wa baʼaxten?

Tumen u kajnáaliloʼob Canaaneʼ maʼatech u meyajtkoʼob Jéeoba. Le beetkeʼ maʼ maʼalob ka tsʼoʼokok u beel máak yéeteloʼobiʼ. Le oʼolal xan jeʼel u páajtal k-aʼalikeʼ, Jacobeʼ maʼ kun utstal tu tʼaan u biskuba Dina yéetel le x-canaaneaʼoboʼ.

U jaajileʼ Dinaeʼ tu yoksuba tiʼ talmiloʼob. ¿Táan wa a wilik teʼ dibujo le canaaneo táan u sen paktik Dinaoʼ? U kʼaabaʼeʼ Siquem. Upʼéel u kʼiinil ka bin Dina xíimbaltkoʼobeʼ, Siquemeʼ tu beetaj u chital Dina tu yéetel kex maʼ u kʼáatiʼ. Lelaʼ maʼ maʼalobiʼ, tumen chéen xiib yéetel koʼolel tsʼoʼokaʼan u beeloʼob maʼalob ka múul chilakoʼob. Le baʼal kʼaas tu beetaj Siquem tiʼ Dinaoʼ tu beetaj u yantal maas talmiloʼob.

Ka ojéeltaʼab tumen u sukuʼunoʼob Dina le baʼax tsʼoʼok u yúuchloʼ, jach kʼuuxchajoʼob. Kaʼatúul tiʼ letiʼobeʼ, Simeón yéetel Levieʼ, jach kʼuuxchajoʼobeʼ, ka tu chʼaʼaj u táatsʼ máaskaboʼobeʼ ka ookoʼob teʼ noj kaajoʼ. Letiʼob túun yéetel u sukuʼunoʼobeʼ tu kíimsoʼob Siquem bey xan tuláakal u xiibiloʼob le kaajoʼ. Le baʼax kʼaas tu beetoʼobaʼ tu jach kʼuuxbesaj Jacob, u taataʼob.

¿Bix úuchik u káajal tuláakal le talmilaʼ? Káaj tumen Dinaeʼ ku biskuba kaʼach yéetel máakoʼob maʼatech u beetkoʼob baʼax kiaʼalik Dios. Toʼon xaneʼ maʼ ken k-bisba yéetel máakoʼob beyaʼ, ¿máasaʼ?