¿A WOJEL wa máaxoʼob le u yéet tsikbaloʼob Jacoboʼ? Ku tsʼoʼokol u máan yaʼab kʼiin jóokʼok u bimbal Jacobeʼ, tiʼ tu yiloʼob naatsʼ tiʼ upʼéel chʼeʼeneʼ. Táan kaʼach u kanáantkoʼob u tamanoʼob. Jacobeʼ tu kʼáatajtiʼob: ¿Tuʼux a taaleʼex?

Letiʼobeʼ tu núukoʼob: Tu kaajil Arán.

Jacobeʼ tu kaʼa kʼáataj: ¿A kʼaj óoleʼex wa Labán?

Letiʼobeʼ tu núukoʼob: K-kʼaj óol, jeʼel xan ku taal Raquel, u paal, yéetel u tamanoʼob Labanoʼ. ¿Táan wa wilik Raquel táan u náatsʼal?

Le ka tu yilaj Jacob táan u taal Raquel yéetel u tamanoʼob u tioeʼ, ka bin u lukʼs u maak le chʼeʼen utiaʼal u jóoʼsaʼal jaʼ u yukʼ le tamanoʼoboʼ. Jacobeʼ ka túun tu tsʼuʼutsʼaj Raqueleʼ ka tu tsʼáaj u yojéelt máax letiʼ. Raqueleʼ jach kiʼimakchaj u yóol, ka bin tu yotoch u tsikbalt tiʼ u taata le baʼax úuchoʼ.

Labaneʼ jach kiʼimakchaj u yóol ikil kun pʼáatal Jacob tu yotoch. Le ka tiaʼalaj xan Jacob u kʼáat tsʼoʼokol u beel yéetel Raqueleʼ, Labaneʼ maas kiʼimakchaj u yóol. Baʼaleʼ, tiaʼalaj tiʼ Jacob ka meyajnak tu yéetel ichil siete jaʼaboʼob yoʼolal Raquel. Jacobeʼ tu beetaj, tumen jach u yaabilmaj Raquel. Baʼaleʼ, ¿a wojel wa baʼax úuch le ka kʼuch u kʼiinil le tsʼoʼokol beeloʼ?

Labaneʼ maʼ tu tsʼáaj Raquel tiʼ Jacobiʼ. Lea u kiiktsilil tu tsʼáajtiʼ. Jacobeʼ tiaʼalaj jeʼel u meyaj uláakʼ siete jaʼaboʼob yéetel Labaneʼ, ka tsʼoʼokeʼ Labaneʼ tu tsʼáaj xan Raquel tiʼ Jacob u yatantej. Teʼ kʼiinoʼob jeʼeloʼ, Dioseʼ ku chaʼik u yantal maas tiʼ utúul u yatan le máakoʼoboʼ. Baʼaleʼ, bejlaʼeʼ jeʼex u yaʼalik le Bibliaoʼ, chéen utúul u yatan máak kʼaʼabéet u yantal.