24 TSIKBALIL
Joseiʼ ku yilik wa láayliʼ kʼasaʼan u sukuʼunoʼobeʼ
JOSEIʼ u kʼáat kaʼach u yil wa láayliʼ kʼasaʼan yéetel minaʼan u yaabilaj u diez sukuʼunoʼobeʼ. Le oʼolaleʼ tiaʼalajtiʼob: Teʼexeʼ taaleʼex chʼúuk. Taaleʼex a wileʼex tuʼux maʼ maʼalob kanáantaʼanil le kaajoʼobaʼ.
Letiʼobeʼ tiaʼaloʼob: Maʼ, maʼ taaloʼon chʼúukiʼ, toʼoneʼ máakoʼon k-bisik upʼéel toj kuxtal. Láaj láakʼtsiloʼon. Kaʼachileʼ doce u túulaloʼon. Baʼaleʼ, utúuleʼ kíimij; u tʼuupileʼ pʼáat yéetel k-taata.
Joseiʼ tu beetaj bey maʼ tu oksaj óoltoʼobeʼ. Ka tu beetaj u kʼalaʼal cárcel Simeón, baʼaleʼ uláakʼoʼoboʼ tu chaʼaj u binoʼob utiaʼal ku bisoʼob baʼal jaantbil tu yotochoʼob. Chéen baʼaleʼ tiaʼalajtiʼob: Ken suunakeʼexeʼ yaan a taaskeʼexten u tʼuupil a wíitsʼneʼexoʼ.
Ka kʼuchoʼob tu yotochoʼob tu luʼumil Canaaneʼ, letiʼobeʼ tu tsikbaltoʼob tiʼ Jacob, u taataʼob, tuláakal le baʼax úuchtiʼoboʼ. Jacobeʼ jach okʼom óolchaji. Ka tiaʼalaj yéetel yaayaj óolal: Joseiʼ minaʼan t-éetel, beooraaʼ Simeoneʼ minaʼan xan. Le oʼolaleʼ, maʼatan in chaʼik a biskeʼex Benjamín, u tʼuupil in paal. Baʼaleʼ, ka káaj u xuʼupul baʼal u jaantoʼobeʼ, Jacobeʼ yanchaj u chaʼik u bisaʼal Benjamín yoʼolal u konaʼal baʼal u jaantoʼob.
Le ka suunaj u sukuʼunoʼobeʼ, Joseiʼ jach kiʼimakchaj u yóol ka tu yilaj Benjamín, u yíitsʼin. Chéen baʼaleʼ, mix utúul tiʼ letiʼob u yojloʼob wa José le máak jach nojoch baʼal yanilaʼ. José túuneʼ yaan baʼax tu beetaj utiaʼal u yilik wa láayliʼ kʼasaʼan u diez majan sukuʼunoʼobeʼ.
Joseiʼ tiaʼalaj ka chuʼupuk tuláakal u costal u sukuʼunoʼob. Tiaʼalaj xan ka oksaʼak u copa beetaʼan yéetel plata tu costal Benjamín, baʼaleʼ maʼ tiaʼalaj baʼax oʼolaliʼ. Le ka chan náachchajoʼobeʼ, Joseiʼ tu túuxtaj u palitsiloʼob chukpachkoʼob. Ka chukpachtaʼaboʼobeʼ, aʼalaʼabtiʼob tumen le palitsiloʼoboʼ: ¿Baʼaxten ta wokolteʼex tiʼ k-tsʼuulil u copa beetaʼan yéetel plata?
U sukuʼunoʼob Joseiʼ tiaʼaloʼob: Maʼ t-okoltaj u copaiʼ. Kaxteʼex, wa ta wileʼex utúul tiʼ toʼon chʼaʼamileʼ, kíimseʼex.
Le palitsiloʼob túunoʼ tu xakʼloʼob tuláakal le costaloʼoboʼ ka tu kaxtoʼob le copa tu costal Benjaminoʼ, jeʼex a wilik teʼ dibujoaʼ. Le palitsiloʼob túunoʼ tiaʼaloʼob: Teʼexeʼ jeʼel u páajtal a bineʼexeʼ, baʼaleʼ Benjamineʼ yaan k-bisik. Beooraaʼ, ¿baʼax ken u beet u majan sukuʼunoʼob José?
Letiʼobeʼ suunajoʼob yéetel Benjamín tu yotoch José. Joseiʼ tiaʼalaj tiʼ u sukuʼunoʼob: Teʼexeʼ jeʼel u páajtal a bineʼex ta wotocheʼexeʼ, baʼaleʼ Benjamineʼ yaan u pʼáatal utiaʼal in palitsiltej.
Judá túuneʼ tiaʼalaj: Wa ka xiʼiken maʼ in bisik le xiʼipalaʼ, jeʼel u kíimil in taataeʼ, tumen jach u yaabilma. Le oʼolaleʼ, kin kʼáat óoltiktech ka palitsilten, baʼaleʼ chaʼa u bin Benjamín.
José túuneʼ tu yilaj tsʼoʼok u kʼexpajal u tuukul u sukuʼunoʼob. Beooraaʼ yaan u yaabilajoʼob, maʼ kʼasaʼanoʼob jeʼex kaʼacheʼ. Koʼox ilik baʼax ken u beet José beooraaʼ.