¡ILAWIL bukaʼaj lubaʼanil u yóol le xiʼipalaʼ! U kʼaabaʼeʼ José, táant u konaʼal tumen u sukuʼunoʼob tiʼ le máakoʼob ku binoʼob Egiptoaʼ. Teʼeloʼ yaan u palitsiltkoʼob José. ¿Baʼaxten tu beetoʼob le baʼal kʼaas u majan sukuʼunoʼoboʼ? Tumen maʼatech u lúubul utsil José tiʼob.

Jacob, u taataʼobeʼ, u sen yaabilmaj José. Le oʼolal tu beetaj upʼéel u jatsʼuts chowak nookʼ utiaʼal. Ka ilaʼab tumen u diez sukuʼunoʼob bix yaabiltaʼanik José tumen Jacobeʼ, káaj u yaatal tu yóoloʼob, ka túun tu pʼektoʼob José. Baʼaleʼ, yaan xan uláakʼ baʼax oʼolal tu pʼektoʼob.

Joseiʼ tu wayakʼtaj kaʼapʼéel baʼal. Ichil le kaʼapʼéel wayakʼaʼ Joseiʼ tu yilaj táan u chintal u sukuʼunoʼob tu táan. Ka tu tsikbaltaj José tiʼob le baʼaxoʼob tu wayakʼtoʼ maas pʼektaʼabi.

Upʼéel kʼiin bijaʼan u sukuʼunoʼob José u kanáantoʼob u tamanoʼob u taataʼobeʼ, Jacobeʼ tu túuxtaj José ilik bix u bintiʼob. Le ka ilaʼab u tíipʼil José tumen u sukuʼunoʼobeʼ, jujuntúul tiʼobeʼ tiaʼaloʼob: ¡Koʼoneʼex kíimsik! Baʼaleʼ, Rubén le sukuʼuntsiloʼ tiaʼalaj: ¡Maʼ, maʼ kíimskeʼex! Ka túun tu puloʼob José tiʼ upʼéel chʼeʼen minaʼan kaʼach u jaʼi. Ka kulaj u chʼaʼatukultoʼob baʼax ken u beetoʼob tiʼ.

Teʼ súutuk jeʼeloʼ kʼuch jujuntúul ismaelitaʼobiʼ. Judaeʼ tiaʼalajtiʼ u majan sukuʼunoʼob ka u konoʼob José tiʼ le ismaelitaʼoboʼ. Bey úuchik u beetkoʼoboʼ. ¡Tu konoʼob José yoʼolal veinte u taakʼinil plata! ¡Jach kʼaas baʼax tu beetoʼob yéetel maʼ tu chʼaʼajoʼob óotsilil tiʼiʼ!

Beoora túunaʼ, ¿baʼax ken u yaʼaloʼob tiʼ u taataʼob? Tu kíimsoʼob utúul chivoeʼ ka tu tʼutʼuboʼob u jatsʼuts nookʼ José ichil u kʼiʼikʼel. Ku tsʼoʼoleʼ ka tu bisoʼob le nookʼ tiʼ Jacoboʼ, ka tiaʼaloʼob: T-kaxtaj lelaʼ, ilawil wa maʼ u nookʼ Joseiʼ.

Jacob túuneʼ tu yileʼ u nookʼ José. Ka tiaʼalaj yéetel yaayaj óolal: Utúul jach tsʼíitsʼik baʼalcheʼ wal kíimseʼ. Lelaʼ letiʼe u kʼáat u sukuʼunoʼob José ka u tukult u taataʼoboʼ. Jacobeʼ jach okʼom óolchaji. Máan yaʼab kʼiinoʼob táan u yoʼtik. Baʼaleʼ, Joseiʼ maʼ kimeniʼ. Koʼox ilik baʼax úuchtiʼ teʼ tuʼux bisaʼaboʼ.