12 TSIKBALIL
Le máakoʼoboʼ ku beetkoʼob upʼéel sen kaʼanal naj
LE KA máan le jaʼaboʼoboʼ, u paalal Noeiʼ yanchaj xan yaʼab u paalaloʼob. U yáabiloʼob Noeiʼ nojochchajoʼob yéetel yanchaj xan u paalaloʼob. Séebaʼan úuchik u yaʼabtal wíinik way Luʼumeʼ.
Utúul tiʼ letiʼobeʼ, Nimrod, u kaʼa áabil Noé. Letiʼeʼ kʼasaʼan kaʼachi, ku kíimsik baʼalcheʼob bey xan máakoʼob. Nimrod xaneʼ tu beetubaj reyil utiaʼal u gobernartik uláakʼ máakoʼob. Baʼaleʼ, maʼ lúub utsil tiʼ Dios baʼax ku beetik Nimrodiʼ.
Teʼ kʼiinoʼob jeʼeloʼ chéen u takáaliliʼ bix u tʼaan le máakoʼoboʼ. Nimrodeʼ u kʼáat kaʼach ka pʼáatkoʼob junmúuchʼil utiaʼal ka páatak u gobernartkoʼob. Le oʼolaleʼ, ¿a wojel wa baʼax tu beetaj? Tiaʼalajtiʼob ka u beetoʼob upʼéel noj kaaj yéetel xan upʼéel sen kaʼanal naj. Teʼ dibujoaʼ jeʼel u páajtal a wilik táan u beetkoʼob ladrilloseʼ.
Le sen kaʼanal najaʼ maʼ lúub utsil tiʼ Jéeobaiʼ. Letiʼeʼ u kʼáat kaʼach ka kʼiʼitpajak máakoʼob tu yóokʼol le Luʼumaʼ. Baʼaleʼ, letiʼobeʼ tiaʼaloʼob: ¡Koʼoneʼex beetik upʼéel noj kaaj yéetel xan upʼéel sen kaʼanal naj ka kʼuchuk tak kaʼan! ¡Bey túunoʼ yaan u yantal baʼax oʼolal k-kʼaʼajsaʼal! Tiʼ letiʼob kaʼach u kʼáatoʼob ka tsʼaʼabak nojbeʼenil, maʼ tiʼ Diosiʼ.
Le oʼolaleʼ, Dioseʼ tu xuʼulsaj u beetaʼal le sen kaʼanal najoʼ. ¿A wojel wa bix úuchik u beetik? Tu xaʼakʼbesaj u tʼaan le máakoʼoboʼ. Pʼáat maʼatech u naʼatkubaʼob. Le oʼolaleʼ le noj kaajoʼ kʼuch u kʼaabaʼt Babel, wa Babilonia, le kʼaabaʼaʼ u kʼáat u yaʼaleʼ «Xaʼakʼbesaj».
Tu yoʼolal túun lelaʼ le máakoʼoboʼ lukʼoʼob Babel. Le ku naʼatkubaʼoboʼ binoʼob múuchʼ kajtal táanxel tuʼuxoʼob tiʼ le Luʼumaʼ.