JOSEIʼ pʼáat maʼ tu páajtal u muklik péeknajaʼanik u yóol. Ka túun tiaʼalaj tiʼ tuláakal u palitsiloʼob ka jóoʼkoʼob. Le ka pʼáat tu juunal yéetel u sukuʼunoʼobeʼ, ka káaj u yokʼol. Bukaʼaj wal úuchik u jaʼakʼal yóol u sukuʼunoʼobeʼ, tumen maʼ u yojloʼob baʼaxten ku yooʼliʼ. José túuneʼ tiaʼalaj: Ten José. ¿Láayliʼ wa kuxaʼan in taataeʼ?

U sukuʼunoʼobeʼ, pʼáat maʼ tu páajtal u tʼaanoʼob, jach sajakchajoʼob. Baʼaleʼ, Joseiʼ tiaʼalaj: Beeteʼex uts a natsʼkabaʼex. Le ka tu natsʼubaʼobeʼ, letiʼeʼ tiaʼalaj: Ten José a wíitsʼneʼex, le ta koneʼex Egiptoeʼ.

Joseiʼ tu utsul aʼalajtiʼob: Maʼ u yaatal a wóoleʼex úuchik a konkeneʼex wayeʼ. U jaajileʼ, Dios túuxten way tu kaajil Egipto yoʼolal in salvartik u kuxtal yaʼab máakoʼobeʼ. Faraoneʼ tsʼoʼok u beetken u jalaʼachil tuláakal le luʼumaʼ. Le oʼolaleʼ, xeeneʼex tu séebaʼanil a waʼaleʼex tiʼ in taata le baʼax tsʼoʼok in waʼalikaʼ. Aʼaleʼex xan tiʼ ka taalak kajtal wayeʼ.

José túuneʼ tu méekʼaj u sukuʼunoʼobeʼ ka tu tsʼuʼutsʼoʼob. Ka tu yojéeltaj Faraón taaljaʼan u sukuʼunoʼob Joseiʼ, tiaʼalaj: Biseʼex le carretaʼob utiaʼal a taaskeʼex a taataʼex yéetel a láakʼtsilileʼexoʼ. Yaan in tsʼáaikteʼex u maas maʼalobil u luʼumil Egipto.

Letiʼobeʼ bey tu beetiloʼoboʼ. Teʼ dibujoaʼ jeʼel u páajtal a wilik José táan u tsʼuʼutsʼik u taata le ka kʼuch Egipto yéetel tuláakal u láakʼtsilileʼ.

U láakʼtsilil Jacobeʼ tsʼoʼok u jach yaʼabtal. Tuláakloʼobeʼ 70 u túulaloʼob ka kʼuchoʼob Egipto, Jacob, u paalal yéetel u yáabiloʼob. Baʼaleʼ, ichiloʼobeʼ tiʼ yaan xan le atantsiloʼoboʼ, yéetel wal yaʼab palitsiloʼobeʼ. Tuláakloʼobeʼ káaj u kajtaloʼob Egipto. Israelita kʼaj óoltaʼabikoʼob, tumen Jacobeʼ Israel jel tsʼaʼabik u kʼaabaʼ tumen Dios. Kʼuch u beetubaʼob upʼéel kaaj jumpáaykúuntaʼan tumen Dios, jeʼex ken k-kan tuláakʼ tsikbaliloʼoboʼ.