ILAWIL tuláakal le paalaloʼobaʼ. U doce paalal Jacob. Letiʼeʼ yanchaj xan u x-chʼupul paalaloʼob. ¿A wojel wa bix u kʼaabaʼ le paalaloʼobaʼ? Koʼox kanik bix u kʼaabaʼob.

Leaeʼ tu síijsaj Rubén, Simeón, Leví yéetel Judá. Le ka tu yilaj Raquel maʼ tu páajtal u yantal u paalaleʼ, jach okʼom óolchaji. Le oʼolaleʼ, tu tsʼáaj Bilha, u x-palitsil, tiʼ Jacob; Bilha túuneʼ yanchaj kaʼatúul u paalal u kʼaabaʼobeʼ Dan yéetel Neftalí. Lea xaneʼ tu tsʼáaj Zilpa, u x-palitsil, tiʼ Jacob; Zilpaeʼ tu síijsaj Gad yéetel Aser. Ku tsʼoʼoleʼ Leaeʼ yanchaj uláakʼ kaʼatúul u paalal, Isacar yéetel Zabulón.

Ka tsʼoʼokeʼ Raqueleʼ páajchaj u yantal utúul u chaambal. Tu tsʼáaj u kʼaabaʼt José. Ku tsʼoʼoleʼ yaan k-kanik u maasil tiʼ José, tumen letiʼeʼ tu beetaj upʼéel nojoch meyaj. Leloʼobaʼ u once paalal Jacob síijoʼob le kajaʼanoʼob kaʼach yiknal Labán u taata Raqueloʼ.

Yaʼab xan u x-chʼupul paalal Jacob yanchaji, baʼaleʼ le Bibliaoʼ kiaʼalik u kʼaabaʼ chéen utúul tiʼ letiʼobiʼ. U kʼaabaʼeʼ Dina.

Kʼuch u kʼiinil u chʼaʼatuklik Jacob u pʼatik Labán utiaʼal u suut tu kaajil Canaán. Le oʼolaleʼ, tu muchʼaj tuláakal u familia, bey xan u tamanoʼob yéetel u wakaxoʼob, ka túun tu káajsaj u binoʼob tu luʼumil Canaán.

Maʼ úuch kʼuchuk Jacob tu luʼumil Canaán yéetel u familiaeʼ, Raqueleʼ tu síijsaj uláakʼ utúul chaambal. Lelaʼ úuch táan u binoʼob táanxel tuʼux. Baʼaleʼ, jach talamchaj tiʼ Raquel, ka kíim le táan u yantal u chaambaloʼ. Baʼaleʼ le chaambaloʼ maʼ kíimiʼ. Jacobeʼ tu tsʼáaj u kʼaabaʼt Benjamín.

Koʼox kʼaʼajsik u kʼaabaʼ u doce paalal Jacob, tumen tuláakal u noj kaajil Israeleʼ taal tiʼ letiʼob. Ku tsʼoʼoleʼ, le u doce chʼiʼibaloʼob Israeloʼ, ku taal u kʼaabaʼob tiʼ diez utúulul u paalal Jacob yéetel tiʼ kaʼatúul u paalal José. Le ka tsʼoʼok u síijil tuláakal le xiʼipalaloʼobaʼ, Isaaqueʼ kuxlaj yaʼab uláakʼ jaʼaboʼob. Bukaʼaj wal úuchik u kiʼimaktal u yóol tumen yaʼab u yáabiloʼobeʼ. Baʼaleʼ, koʼox ilik baʼax úuch tiʼ Dina u yáabil Isaac.