LE MÁAKOʼOB ka wilik teʼ dibujoaʼ táan u sen beetkoʼob u meyaj le máakoʼoboʼ. Ilawil le máak táan u sen jatsʼik le palitsiloʼ. Le palitsiloʼobaʼ u láakʼtsiloʼob Jacob, kiaʼalaʼal israelita tiʼob. Le máaxoʼob beetik u sen meyajoʼoboʼ egipcioʼob. Le israelitaʼoboʼ tsʼoʼok u palitsiltaʼaloʼob tumen le egipcioʼoboʼ. ¿Bix úuchik lelaʼ?

Tuláakal u láakʼtsilil Jacobeʼ xáanchaj tiʼ kajaʼanoʼob Egipto ich jeetsʼelileʼ. José le máak maas nojoch baʼal yanil Egipto ken tsʼoʼokok Faraón le reyoʼ, letiʼ kanáantikoʼob kaʼachi. Baʼaleʼ, ku máan kʼiineʼ kíim José. Ka tsʼoʼokeʼ tu kaajil Egiptoeʼ kʼuch u beetubaj reyil uláakʼ utúul Faraón maʼatech u lúubul utsil le israelitaʼob tiʼoʼ.

Le kʼasaʼan Faraón túunaʼ tu palitsiltaj le israelitaʼoboʼ. Tu tsʼáaj xan máakoʼob jach maʼatech u chʼaʼikoʼob óotsilil utiaʼal nuʼutik u meyajoʼob. Leloʼobaʼ tu sen beetoʼob u meyaj le israelitaʼob utiaʼal ku beetoʼob kaajoʼob utiaʼal Faraonoʼ. Baʼaleʼ, le israelitaʼoboʼ maʼ xuʼul u yaʼabtaloʼobiʼ. Ka máan kʼiineʼ le egipcioʼoboʼ sajakchajoʼob u sen yaʼabtal le israelitaʼob ka sen yanak u páajtaliloʼoboʼ.

¿A wojel wa baʼax tu beetaj Faraón? Tu tʼanaj le koʼoleloʼob meyajtik le x-israelitaʼob ken yanak u paalaloʼoboʼ, ka tiaʼalajtiʼob: Tuláakal mejen xiʼipalal kun síijleʼ yaan a kíimskeʼex. Baʼaleʼ, le koʼoleloʼobaʼ utsoʼob, maʼ tu kíimsoʼob le chaambaloʼoboʼ.

Le oʼolaleʼ, Faraoneʼ tiaʼalaj tiʼe kaajoʼ: Kíimseʼex tuláakal le mejen xiʼipalal israelitaʼoboʼ. Chéen le mejen x-chʼúupalal ka chaʼex u kuxtaloʼoboʼ. ¿Máasaʼ jach kʼaas le baʼax tiaʼalaj ka beetaʼakaʼ? Koʼox ilik bix salvartaʼabik utúul chan xiʼipal.