¿AWOJEL wa baʼax tu yáax beetaj Noé ka jóokʼ yéetel u láakʼtsilil teʼ cheemoʼ? Letiʼeʼ tu kíimsaj baʼalcheʼob u kʼub tiʼ Dios. Ilawil teʼ dibujo bix úuchik u beetkoʼ. Noeiʼ tu beetaj lelaʼ utiaʼal u tsʼáaik nib óolal tiʼ Dios, tumen maʼ kíim u láakʼtsilil teʼ nojoch búulkabaloʼ.

¿Kʼaʼam wa tumen Jéeoba? Kʼaʼamij. Le oʼolal tiaʼalaj tiʼ Noé mix bikʼin u kaʼa túuxtik uláakʼ búulkabal utiaʼal u xuʼulsik le yóokʼol kaabaʼ.

Maʼ xáanchaj ka láaj tij le luʼumoʼ. Ka jóokʼoʼob teʼ cheemoʼ Noé yéetel u láakʼtsilileʼ tu káajsoʼob upʼéel túumben kuxtal. Dioseʼ tu utsul aʼalajtiʼob: Yanak yaʼab a paalaleʼex, chupeʼex yóokʼol kaab yéeteloʼob.

Baʼaleʼ, ken uʼuyak u tsikbalil le nojoch búulkabal tumen le máakoʼoboʼ, maʼ xan ka sajakchajkoʼob u kaʼa taal uláakʼ búulkabaliʼ. Le beetkeʼ Dioseʼ tu tsʼáaj upʼéel baʼal utiaʼal u kʼaʼajsik tiʼ máakoʼob mix bikʼin u kaʼa bulik le Luʼumaʼ. ¿A wojel wa baʼax tu tsʼáaj? Upʼéel chéel.

Yaʼab u téeneleʼ le chéeloʼ ku chíikpajal teʼ kaʼan ken juulnak le Kʼiin ken tsʼoʼokok u kʼáaxal jaʼoʼ. Le chéeloʼ yaʼab u coloriloʼob. ¿Yaan wa chéel a wilmaj? ¿Táan wa wilik le yaan teʼ dibujoaʼ?

Dioseʼ tiaʼalajtiʼob: Maʼ bíin suunaken in xuʼuls tiʼ wíinikoʼob, mix tiʼ baʼalcheʼob yéetel upʼéel búulkabaliʼ; maʼ bíin suunaken xan in túuxt upʼéel búulkabal utiaʼal kʼaskúuntik le Luʼumaʼ. Táan in tsʼáaik in chéel teʼ múuyaloʼoboʼ. Beyoʼ, le ken chíikpajkeʼ, yaan in wilik yéetel yaan in kʼaʼajsik baʼax in waʼalmaj.

Le oʼolaleʼ, ken a wil upʼéel chéeleʼ, ¿baʼax kʼaʼabéet a kʼaʼajsik? Le baʼax u yaʼalmaj Diosoʼ, letiʼeʼ mix bikʼin u kaʼa xuʼulsik yóokʼol kaab yéetel uláakʼ nojoch búulkabal.