¿TÁAN wa wilik baʼax ku yúuchul teʼelaʼ? Le máakoʼobaʼ u soldadoiloʼob Israel. Le ka wilik nokokbaloʼoboʼ táan u yukʼikoʼob jaʼ. Gedeón, le juesoʼ, maʼ náach tiʼob waʼalakbaliʼ. Letiʼeʼ táan u jach ilik bix u yukʼikoʼob jaʼ.

Ilawil bix u yukʼik jaʼ le máakoʼobaʼ. Yanoʼobeʼ ku noktaloʼob u yukʼoʼob le jaʼoʼ. Baʼaleʼ, utúuleʼ lóochʼbil u beetik utiaʼal u yukʼe, yoʼolal u páajtal u yilik baʼax ku yúuchul tu baʼpaach. Lelaʼ jach maʼalob, tumen Jéeobaeʼ tsʼoʼok u yaʼalik tiʼ Gedeón ka u yéey chéen le máax maʼ náay u yóol táan u yukʼik jaʼoʼ. U maasiloʼoboʼ kʼaʼabéet u suutoʼob tu yotochoʼob. Koʼox ilik baʼaxten.

Le israelitaʼoboʼ tiaʼanoʼob tu kaʼatéen ich talmiloʼobeʼ, tumen maʼ tu beetoʼob baʼax u kʼáat Jéeobaiʼ. Le madianiloʼoboʼ tsʼoʼok u maas yaʼabtaloʼob, le oʼolal ku beetkoʼob kʼaas tiʼ Israel. Le israelitaʼob túunoʼ tu kʼáatoʼob tiʼ Jéeoba ka áantaʼakoʼob, Jéeoba túuneʼ tu yáantoʼob.

Jéeobaeʼ tiaʼalaj tiʼ Gedeón ka u muchʼ u soldadoʼob, ka túun tu muchʼaj 32.000 soldadoʼob. Baʼaleʼ 135.000 soldadoʼob taaljaʼanoʼob u baʼateltoʼob Israel. Chéen baʼaleʼ, Jéeobaeʼ tiaʼalaj tiʼ Gedeón: Jach yaʼab soldadoʼob yantech. ¿Baʼaxten tiaʼalaj leloʼ?

Tumen wa ku ganarkoʼob le israelitaʼob le baʼateloʼ, maʼ xan ka u tukloʼob chéen tu juunaloʼob tu ganartoʼobiʼ, bey maʼ kʼaʼabéetchajtiʼob u yáantaj Jéeobaeʼ. Le beetik Jéeobaeʼ tiaʼalaj tiʼ Gedeón: Aʼal tiʼ tuláakal le soldadoʼob saajkoʼoboʼ ka suunakoʼob tu yotochoʼob. Le ka tiaʼalaj Gedeón lelaʼ, 22.000 utúulal binoʼob tu yotochoʼobiʼ. Ka tsʼoʼokeʼ, pʼáat chéen 10.000 utúulal utiaʼal baʼateʼel yéetel le 135.000 soldadoʼoboʼ.

Baʼaleʼ, Jéeobaeʼ tu kaʼa aʼalaj: Láayliʼ jach yaʼab soldadoʼob yantecheʼ. Ka túun tiaʼalaj tiʼ Gedeón ka u beet u yukʼik jaʼ le soldadoʼob teʼ áalkab jaʼoʼ yéetel ka u túuxt tu yotochoʼob tuláakal le kun noktal u yukʼ jaʼoʼ. Tsʼoʼoleʼ Jéeobaeʼ tiaʼalaj: Yaan in beetik a ganartik le baʼateʼel yéetel le 300 soldadoʼob maʼ náay u yóoloʼob táan u yuʼkoʼob jaʼoʼ.

Kʼuch u kʼiinil le baʼateloʼ. Gedeoneʼ tu jóoʼsaj óox jaats tiʼ u 300 soldadoʼob. Tiʼ tuláakal le soldadoʼoboʼ tu tsʼáaj jujumpʼéel baak tiʼob utiaʼal u yustoʼob yéetel mejen pʼúuloʼob yaan upʼéel táajcheʼ tʼabaʼan ichil. Taʼaytak u tsʼáaik chúumuk áakʼab ka tu muchʼubaʼob tuláakloʼob tu baʼpaach tuʼux yaan le madianiloʼoboʼ. Tuláakloʼob u puul ka tu yustoʼob le baakoʼoboʼ yéetel tu paʼajoʼob le mejen pʼúuloʼoboʼ, táan u yawtikoʼob: ¡U táatsʼ máaskab Jéeoba yéetel u táatsʼ máaskab Gedeón! Le ka aaj le madianiloʼoboʼ, jach saʼat u yóoloʼob, maʼ tu kaxtaj baʼax u beetoʼobiʼ. Ka láaj púutsʼoʼob, le israelitaʼob túunoʼ tu ganartoʼob le baʼateloʼ.