YAʼAB tiʼ u kaajiloʼob Canaaneʼ táan u líiʼskubaʼob utiaʼal u binoʼob baʼateʼel yéetel Israel. Ku tuklikoʼobeʼ jeʼel u páajtal u tsʼáanchaʼatkoʼobeʼ. Baʼaleʼ u kajnáaliloʼob Gabaoneʼ maʼ bey u tuklikoʼobiʼ. Letiʼobeʼ u yojloʼob Dios áantik le israelitaʼoboʼ, le beetkeʼ maʼ u kʼáatoʼob baʼateʼel yéetel Diosiʼ. Le oʼolaleʼ, ¿a wojel wa baʼax tu beetaj le gabaonitaʼoboʼ?

Tu chʼaʼatukultaj u beetkoʼob u yilaʼal bey jach náach kajaʼanoʼobeʼ. Le beetkeʼ jujuntúuloʼobeʼ tu búukintoʼob jaʼajat nookʼoʼob yéetel xanab laabtak. Ku tsʼoʼoleʼ ka tu kʼaxláantoʼob yóokʼol u burroʼob costaloʼob laabtak chuup yéetel chuchul waaj. Ka túun binoʼob yiknal Josué, ka kʼuchoʼobeʼ tiaʼaloʼob: Toʼoneʼ jach náach tuʼux k-taal, tumen t-uʼuyaj u tsikbalil jach yaan u páajtalil a Dioseʼex. Yéetel t-ojéeltaj xan tuláakal le baʼax tu beetaj ta woʼolaleʼex tu kaajil Egiptooʼ. Le beetkeʼ k-jalaʼachoʼobeʼ tu yaʼaloʼobtoʼon ka k-chʼaʼaj yaʼab janal utiaʼal ka taalakoʼon k-tsʼáa a wojéelteʼexeʼ a palitsiloʼoneʼex. Le beetkeʼ aʼaleʼextoʼon maʼatan a baʼateleʼex t-éetel. Tak teʼexeʼ jeʼel u páajtal a wilkeʼex tsʼoʼok u laʼabal k-nookʼ yoʼolal le náanach xíimbal tsʼoʼok k-beetkoʼ yéetel k-oʼoch waajeʼ tsʼoʼok xan u chuchultal.

Josué yéetel uláakʼ u nuuktakiloʼob le kaajoʼ tu oksaj óoltoʼob le baʼax tiaʼalaj le gabaonitaʼoboʼ. Le oʼolaleʼ tu chʼaʼatʼantoʼob maʼatan u binoʼob baʼateʼel tu yéeteloʼob. Baʼaleʼ, óoxpʼéel kʼiin úuchuk lelaʼ ka tu yojéeltoʼob u jaajil, le gabaonitaʼoboʼ maʼ náach kajaʼanoʼobiʼ.

Josué túuneʼ tiaʼalajtiʼob: ¿Baʼaxten ta waʼaleʼextoʼon jach náach tuʼux a taaleʼex?

Le gabaonitaʼob túunoʼ tu núukoʼob: Tumen aʼalaʼabtoʼon Jéeoba a Dioseʼexeʼ u yaʼalmaj u tsʼáaikteʼex tuláakal u luʼumil Canaán. Le oʼolal sajakchajoʼon a kíimskoʼoneʼex. Baʼaleʼ, le israelitaʼoboʼ tu beetoʼob le baʼax tu chʼaʼatʼantoʼobeʼ, maʼ tu kíimsoʼob le gabaonitaʼoboʼ. Baʼaleʼ le gabaonitaʼoboʼ palitsiltaʼaboʼob tumen le israelitaʼoboʼ.

U reyil Jerusaleneʼ kʼuuxilnaji tumen le gabaonitaʼoboʼ tsʼoʼok u tsʼáaikubaʼob tu tséel Israel. Le oʼolal tiaʼalaj tiʼ uláakʼ kantúul reyoʼob: Koʼoteneʼex a wáanteneʼex baʼateʼel yéetel u kajnáaliloʼob Gabaón. Bey túun tu beetil le cinco reyoʼoboʼ. Beooraaʼ táan u taal le reyoʼob baʼateʼel yéetel Gabaonoʼ, ¿jeʼel wa túun u páajtal k-aʼalik jach yaan u naʼat le gabaonitaʼob úuchik u tsʼáaikubaʼob tu tséel Israeloʼ? Koʼox ilik.