LE KA tu yoksubaʼob le israelitaʼob ich talmiloʼobeʼ, tu kʼáatoʼob tiʼ Jéeoba ka áantaʼakoʼob. Letiʼeʼ tu tsʼáaj máaxoʼob utiaʼal áantkoʼob maʼ saajkoʼobiʼ. Le Bibliaoʼ kiaʼalikeʼ le máakoʼobaʼ juesoʼob. Josueiʼ letiʼ tu yáax beetaj u juesil, ku tsʼoʼokoleʼ yanchaj uláakʼ juesoʼob, u kʼaabaʼobeʼ Otoniel, Ehúd yéetel Samgar. Baʼaleʼ kaʼatúul tiʼ le máaxoʼob áant Israeloʼ koʼoleloʼob, u kʼaabaʼobeʼ Débora yéetel Jael.

Déboraeʼ x-profeta. Jéeobaeʼ kiaʼaliktiʼ baʼax ku taal u kʼiin yúuchul, letiʼ túuneʼ kiaʼalik tiʼe máakoʼob baʼax kiaʼalik Jéeobaoʼ. Débora xaneʼ x-juez. Suukaʼan kaʼach u kutal tu yáanal u kúul xaʼan yaan yóokʼol upʼéel wits; le máaxoʼob yaan talmil tiʼobeʼ ku binoʼob kaʼach yiknal Débora utiaʼal ka áantakoʼob.

Teʼ kʼiinoʼob jeʼeloʼ Jabín ku beetik u reyil Canaán. Tiʼ letiʼeʼ yaan 900 u carroiloʼob baʼateʼel. Yéetel tumen jach yaʼab u soldadoʼobeʼ, tsʼoʼok u palitsiltik yaʼab israelitaʼob. Sísara u nojchil u soldadoʼob Jabín.

Upʼéel kʼiinileʼ, Déboraeʼ tu tʼanaj Barac ka tiaʼalajtiʼ: Jéeobaeʼ tsʼoʼok u yaʼalik: Chʼaʼa diez mil máakoʼob ka bisoʼob tu witsil Tabor. Teʼeloʼ tiʼ ken in beet u taal Sísara ta wiknaliʼ. Teneʼ yaan in kʼubik ta kʼab paʼteʼ yéetel u soldadoʼob.

Barac túuneʼ tiaʼalaj tiʼ Débora: Jeʼel in bin wa ka wóot bin tin wéeteleʼ. Débora túuneʼ binij, baʼaleʼ tiaʼalaj tiʼ Barac: U nojbeʼenil le baʼateloʼ maʼ bíin a tiaʼalintiʼ, tumen Jéeobaeʼ yaan u kʼubik Sísara tu kʼab utúul koʼolel. Lelaʼ bey úuchik.

Baraqueʼ éem tu witsil Tabor utiaʼal baʼateʼel yéetel u soldadoʼob Sísara. Jéeoba túuneʼ, chéen ka tu beetaj u káajal u kaʼantal u jaʼiʼ le tuʼuxanoʼoboʼ; yaʼab tiʼe máaxoʼob baʼatelkoʼoboʼ búuloʼob. Sísaraeʼ éem tu carroeʼ ka púutsʼi.

Maʼ xáanchaj ka kʼuch Sísara tu pasel Jaeliʼ. Letiʼeʼ tiaʼalaj tiʼ ka okok, ka túun tu tsʼáaj upʼíit leche u yukʼe. Lelaʼ tu beetaj u taaktal u wenel, maʼ xáanchaj ka weeniʼ. Jael túuneʼ tu chʼaʼaj upʼéel u cheʼi u pasel jóoʼsaʼan u puntaeʼ ka tu baja tu pool Sísara. ¡Ka túun kʼuch Baraqueʼ, Jaeleʼ tu yeʼesaj tiʼ tsʼoʼok u kíimil Sísara! Le baʼax tiaʼalaj Déboraoʼ béeychaji.

Tu tsʼookeʼ ka kíimsaʼab rey Jabín; bey túunoʼ yanchaj jeetsʼelil ich u kaajil Israel ich tsʼeʼetsʼek kʼiinoʼob.