ILAWIL le janalbeʼen ichoʼob kuchaʼan tumen le máakoʼoboʼ. Ilawil bukaʼaj nojchil u pʼóochol le uvaoʼ. Kaʼatúul máakoʼob kuchmil tiʼ upʼéel cheʼ. Ilawil xan le igoʼob yéetel le granadaʼoboʼ. ¿Tuʼux chʼaʼab u yich le cheʼob jach nuuktakaʼ? Tu luʼumil Canaán. Kʼaʼajaktecheʼ tiʼ kajaʼan kaʼach Abraham, Isaac yéetel Jacobiʼ. Baʼaleʼ, yoʼolal le wiʼijil yanji teʼeloʼ, Jacobeʼ bin yéetel u láakʼtsilil Egipto. Tsʼoʼok túun u máan doscientos dieciséis jaʼaboʼob, Moiseseʼ táan u kaʼa sutik le israelitaʼob tu luʼumil Canaanoʼ. Beooraaʼ tiʼ yanoʼob Cades, teʼ x-tokoy luʼumoʼ.

Canaaneʼ kʼasaʼan máakoʼob kajaʼanoʼobiʼ. Le oʼolaleʼ, Moiseseʼ tiaʼalaj tiʼ doce máakoʼob ka xiʼikoʼob u yiloʼob jach bix le kaajoʼ: Ilawileʼex bey jaytúul máakoʼob kajaʼanoʼobeʼ yéetel bukaʼaj muʼukʼaʼaniloʼob. Ilawileʼex xan wa maʼalob le luʼum utiaʼal paakʼaloʼ. Bik pʼáatak xan maʼ taaskeʼex wa jaypʼéel u yich le cheʼoboʼ. Ka túun tu túuxtoʼob.

Le ka suunaj le j-chʼúukoʼob Cadesoʼ, tiaʼaloʼob tiʼ Moisés: Jach tu jaajil upʼéel maʼalob luʼum. Utiaʼal túun u yeʼeskoʼobeʼ, tu taasoʼob jujumpʼéel u yich u cheʼiloʼob. Baʼaleʼ, diez tiʼ le j-chʼúukoʼoboʼ tiaʼaloʼob: Jach nuuktak u wíinklil u kajnáaliloʼob yéetel jach muʼukʼaʼanoʼob. Wa k-tsʼáaikba chʼaʼaj le kaaj tiʼoboʼ, yaan u kíimskoʼonoʼob.

Le ka tu yuʼubaj le israelitaʼoboʼ, jaʼakʼ u yóoloʼob. Ka túun tiaʼaloʼob: Maas maʼalob kaʼach ka kíimkoʼon Egipto, wa tak teʼ x-tokoy luʼumaʼ. Teʼ baʼateʼel ken k-kíimleʼexoʼ, k-atanoʼob yéetel k-paalaloʼobeʼ yaan u lúubloʼob tu kʼab le máaxoʼob pʼekmailoʼonoʼ. Le oʼolaleʼ, ¡koʼoneʼex yéeyik u jeel k-joʼolpóop utiaʼal ka suunakoʼon Egipto!

Baʼaleʼ kaʼatúul tiʼ le j-chʼúukoʼoboʼ u kʼubmaj u yóoloʼob tiʼ Jéeoba, le oʼolaleʼ tu tsʼáajubaʼob kaʼach u jetsʼ u yóol le israelitaʼoboʼ. U kʼaabaʼobeʼ Josué yéetel Caleb. Tiaʼaloʼob: Maʼ chʼaʼikeʼex saajkil, Jéeobaeʼ tiaʼan t-éeteleʼexeʼ. Maʼ talam jeʼel k-tiaʼalintik le luʼumoʼ. Baʼaleʼ, le kaajoʼ maʼ tu yuʼubaj tʼaaniʼ, taakchaj u kíimskoʼob Josué yéetel Caleb.

Lelaʼ tu jach kʼuuxbesaj Jéeoba, ka túun tiaʼalaj tiʼ Moisés: Tuláakal le yaan veinte u jaʼabiloʼob wa maaseʼ, mix utúul tiʼ letiʼob kun ookloʼob tu luʼumil Canaaniʼ. Tsʼoʼok u yilkoʼob le milagroʼob tin beetaj Egiptooʼ, bey xan le tin beetaj teʼ x-tokoy luʼumoʼ, kex beyoʼ láayliʼ maʼ u kʼub u yóoloʼob tiʼ teneʼ. Le oʼolaleʼ, ich cuarenta jaʼaboʼob kun chéen máanoʼob teʼ x-tokoy luʼumoʼ, tak ken láaj kíimikoʼob. Chéen Josué yéetel Caleb kun ookloʼob tu luʼumil Canaán.