ICHIL le Bibliaoʼ yaan upʼéel libro ku kʼaabaʼtik, Rut. Ku tsikbaltik u kuxtal upʼéel familia kuxlaj tu kʼiinil u juesiloʼob Israel. Ruteʼ utúul x-lóoʼbayan koʼolel x-moabil; maʼ x-israelitaiʼ. Baʼaleʼ, Ruteʼ ka tu kʼaj óoltaj Jéeoba u jaajil Dioseʼ, tu sen yaabiltaj. Noemieʼ utúul nojoch koʼolel áant Rut u kʼaj óolt Jéeoba.

Noemieʼ x-israelita. Le ka pʼáat maʼ jach yaan baʼal jaantbil Israeleʼ, letiʼ yéetel u yíichameʼ, bey xan tu kaʼatulal u paalaloʼobeʼ, binoʼob kajtal tu luʼumil Moab. Upʼéel u kʼiinileʼ, u yíicham Noemieʼ kíimij. Ku tsʼoʼoleʼ, u paalal Noemieʼ tsʼoʼok u beeloʼob yéetel kaʼatúul x-moabiloʼob u kʼaabaʼobeʼ Rut yéetel Orfa. Óoliʼ diez jaʼaboʼob úuchuk lelaʼ, ka xan kíim tu kaʼatulal u paalal Noemí. ¡Jach yaj baʼax úuchtiʼ! ¿Baʼax ken u beet Noemí beooraaʼ?

Upʼéel u kʼiinileʼ, Noemieʼ tu tuklaj u suut tu kaajal, lelaʼ jach náach u xíimbalil. Rut yéetel Orfaeʼ u kʼáatoʼob bin tu yéetel, ka túun tu láakʼintoʼob. Maʼ sáam káajak u binoʼobeʼ, Noemieʼ tiaʼalaj tiʼ u yilboʼob: Suunakeʼex ta kaajaleʼex, pʼáatkeʼex yiknal a mamaʼex.

Ka túun tsʼuʼutsʼaʼaboʼob tumen Noemí. Letiʼob túuneʼ ka joʼopʼ yooʼloʼob, tumen jach u yaabiltmoʼob Noemí. Táan u yaʼalikoʼob: ¡Maʼatan k-pʼatkech! Toʼoneʼ yaan k-bin ta wéetel ta kaajal. Baʼaleʼ, Noemieʼ tu núukajtiʼob: In paalaleʼex, kʼaʼabéet a suuteʼex. Maas jeʼel u binteʼex utsil yiknal a láakʼeʼexeʼ. Ka tu yuʼubaj Orfaeʼ ka tu káajsaj u suut tu kaajal. Baʼaleʼ, Ruteʼ maʼ suunajiʼ.

Ka tu sutuba Noemí yiknaleʼ ka tiaʼalajtiʼ: Orfaeʼ tsʼoʼok u bin. Xeen xan tu yéetel. Baʼaleʼ Ruteʼ tu núukaj: ¡Maʼ kʼáat óoltikten ka in pʼatech! Chaʼa in bin ta wéetel, jeʼel tuʼuxak ka xiʼikecheʼ tiʼ xan kin biniʼ, jeʼel tuʼuxak ka kajlakecheʼ tiʼ xan kin kajtaliʼ. A kaajaleʼ letiʼ ken in kaajalte, a Dioseʼ letiʼ ken in Diosinte. Le tuʼux kan kíimleʼ tiʼ xan kin kíimliʼ, tiʼ xan bíin muʼukukeniʼ. Le ka tiaʼalaj Rut lelaʼ, Noemieʼ maʼ tu kaʼa aʼalajtiʼ ka suunakiʼ.

Le ka kʼuchoʼob tu kaajil Israeleʼ tiʼ pʼáatoʼob kajtaliʼ. Ruteʼ tu séebaʼanil káaj u meyaj teʼ ich kooloʼoboʼ, tumen u kʼiinil u molaʼal cebada. Utúul máak u kʼaabaʼ Boozeʼ tu chaʼaj tiʼ Rut u molik cebada tu kool. ¿A wojel wa máax u mama Booz? Rahab, le x-jericoileʼ.

Upʼéel u kʼiinileʼ, Boozeʼ tiaʼalaj tiʼ Rut: Tsʼoʼok in wojéeltik tuláakal baʼax ta beetaj tu yoʼolal Noemí. In wojel ta pʼataj a taata, a mama bey xan a kaajal, ka taalech kajtal tiʼ upʼéel kaaj maʼ kʼaj óol kaʼachiʼ. ¡Kin kʼat óoltik ka u yeʼestech u yutsil Jéeoba!

Rut túuneʼ tu núukaj: Jach utsech tin wéetel nojoch máak. Tsʼoʼok a beetik in wuʼuykimba maʼalob yoʼolal le utsul baʼaloʼob tsʼoʼok a waʼaliktenoʼ. Ruteʼ jach lúub utsil tiʼ Booz, maʼ xáanchaj ka tsʼoʼok u beeloʼobiʼ. ¡Bukaʼaj úuchik u kiʼimakkúuntik u yóol Noemí leloʼ! Baʼaleʼ, maas kiʼimakchaj yóol Noemí ka yanchaj Obed, u yáax paal Rut yéetel Booz. Ku tsʼoʼoleʼ, Obedeʼ kʼuch u beetuba abueloi tiʼ David; yaan xan k-kanik u maasil tiʼ David.