¿BAʼ AX beetik u níikil u baʼpakʼil Jericó? Bey upʼéel nojoch bomba puʼul tu yóoʼleʼ. Baʼaleʼ tiʼ le kʼiinoʼob jeʼeloʼ minaʼan kaʼach bombaʼob mix cañonoʼob. ¡Lelaʼ uláakʼ upʼéel u milagro Jéeoba! Koʼox ilik bix úuchik.

Uʼuy baʼax kiaʼalik Jéeoba tiʼ Josué: Teech yéetel a soldadoʼobeʼ xíimbalnakeʼex tu baʼpaach le noj kaajoʼ. Baʼpachteʼex utéen sáamsamal ichil seis kʼiinoʼob. Biseʼex u baʼascheʼi le nuptʼaanoʼ. Táanil tiʼ le baʼascheʼoʼ kʼaʼabéet u bin siete j-kʼiinoʼob táan u bin u yuskoʼob baak.

Tu siete kʼiineʼ, xíimbalnakeʼex siete u téenel tu baʼpaach le noj kaajoʼ. Ku tsʼoʼokol túuneʼ usteʼex le baak x-maʼ jeʼeliloʼ, yéetel tuláakleʼexeʼ awatnakeʼex yéetel tuláakal a muukʼeʼex jeʼex u yaawtil baʼateleʼ. ¡Le baʼpakʼoʼob túunoʼ yaan u níikloʼob!

Josué yéetel le kaajoʼ tu beetoʼob le baʼax aʼalaʼabtiʼob tumen Jéeobaoʼ. Le táan u xíimbaloʼoboʼ mix utúul ku tʼaaniʼ. Chéen u juum u yustaʼal baak ku yuʼubaʼal yéetel u bin u xíimbaloʼob. Bukaʼaj wal úuchik u sajaktal le jericoiloʼoboʼ. ¿Táan wa wilik le chak suum chʼuyukbaj tiʼ upʼéel ventanaoʼ? ¿Máax ventanaiʼ? U ventanai u yotoch Rahab, letiʼeʼ tsʼoʼok u beetik le baʼax aʼalaʼabtiʼ tumen le kaʼatúul j-chʼúukoʼobeʼ. Tuláakal u láakʼtsilileʼ tiaʼan tu yéetel ichil u yotocheʼ, táan u páaʼtik u yilkoʼob baʼax kun úuchul.

Tu siete kʼiinileʼ, ku tsʼoʼokol u xíimbaloʼob siete u téenel tu baʼpaach le noj kaajoʼ, ustaʼab le baakoʼoboʼ, kʼaʼam awatnaj xan le soldadoʼoboʼ, le baʼpakʼoʼob túunoʼ níikoʼob. Josué túuneʼ tiaʼalaj: Kíimseʼex le máakoʼoboʼ, tóokeʼex xan le kaaj yéetel tuláakal baʼaxoʼob yanoʼoʼ, chéen le plata, oro, cobre yéetel fierrooʼ maʼ ken a tóokeʼexoʼ tumen yaan a biskeʼex teʼ tabernáculooʼ.

Josué túuneʼ tiaʼalaj tiʼ le kaʼatúul j-chʼúukoʼobeʼ: Jóoʼseʼex Rahab tu yotoch yéetel tuláakal u láakʼtsilil. Jach jeʼex aʼalaʼabik tiʼ tumen le j-chʼúukoʼobeʼ, mix baʼal úuchtiʼob.