¿AWOJEL wa baʼax le ku chíikpajal teʼ dibujoaʼ? Upʼéel naj beetaʼan utiaʼal u adorartaʼal Jéeoba. U kʼaabaʼeʼ tabernáculo. Tsʼoʼoksaʼab tumen le kaaj chéen upʼéel jaʼab jóoʼkoʼob Egiptooʼ. ¿A wojel wa máax tiʼ taal u tuukulil u beetaʼal?

Tiʼ Jéeoba. Le tiaʼan Moisés tu kaʼanlil u witsil Sinaieʼ Jéeoba aʼaltiʼ bix ken u beetil. Tiaʼalajtiʼeʼ, le bix ken u beetiloʼ séeb ka páajchajak u paʼabal yéetel u jel beetaʼal. Beyoʼ jeʼel u páajtal u bisaʼal u jáajatsal táanxel tuʼux utiaʼal ka jel waʼakúunsaʼakeʼ. Le oʼolaleʼ, ken xiʼik le israelitaʼob táantanxel tuʼux tiʼ le x-tokoy luʼumoʼ, u yéet binoʼob le najoʼ.

Wa ka pakt u chan cuartoi le najoʼ jeʼel u páajtal a wilik upʼéel cajaeʼ. Le cajaoʼ u kʼaabaʼeʼ u baʼascheʼi nuptʼaan. Tu yóoʼleʼ yaan kaʼach kaʼatúul ángeloʼob wa querubinoʼob beetaʼanoʼob yéetel oro, aktáan yanil utúul tiʼ uláakʼiʼ. Dioseʼ tu kaʼa tsʼíibtaj le Diez Mandamientos tiʼ kaʼapʼéel táax tuunichoʼ, tumen Moiseseʼ tu paʼaj le yáax tsʼaʼabtiʼoʼ. Le kaʼapʼéel tuunichoʼobaʼ líiʼsaʼaboʼob ichil u baʼascheʼi le nuptʼaanoʼ. Líiʼsaʼab xan upʼéel chan pʼúul maná ichil. ¿Kʼajaʼan wa tech baʼax le manaoʼ?

Jéeobaeʼ tu yéeyaj Aarón, u sukuʼun Moisés, utiaʼal u beet u nojoch j-kʼiinil. Letiʼ kaʼansik tiʼe kaaj bix unaj u adorarkoʼob Jéeobaoʼ. U paalal xaneʼ j-kʼiinoʼob.

Beooraʼ ilawil u maas nojchil u cuartoi le najoʼ. Yaan kaʼatéen u maas nojchil tiʼe chan cuarto t-yáax ileʼ. ¿Táan wa wilik le chan caja tuʼux ku jóokʼol le buutsʼoʼ? Lelaʼ u altari tuʼux ku tóokaʼal incienso, upʼéel baʼal jach kiʼibok. Ilawil xan le candelabro yaan siete u sáasiloʼoboʼ. U yóoxpʼéel baʼax yaan teʼ cuartooʼ, upʼéel mesa tuʼux mantatsʼ yaan doce waajoʼobiʼ.

Tu táankabil le tabernáculooʼ yaan upʼéel nojoch káat chuup yéetel jaʼiʼ. Teʼelaʼ tiʼ ku pʼoʼik u kʼaboʼob yéetel u yookoʼob le j-kʼiinoʼoboʼ. Tiʼ yaan xan upʼéel nojoch altar tuʼux ku tóokaʼal kíimsbil baʼalcheʼob utiaʼal kʼubbil tiʼ Jéeobaiʼ. Le tabernáculooʼ tiʼ yaan chúumuk teʼ tuʼux jelekbal le israelitaʼoboʼ, bey túunoʼ tu baʼpaach kajaʼanoʼob tiʼ mejen pasel beetaʼanoʼob yéetel nookʼ.