¡ILAWIL baʼaxoʼob ku mukik le máak tu yotochoʼ! Upʼéel jatsʼuts nookʼ, u xóotʼ oro yéetel u xéexetʼal plata. Tu kaajil Jericó tu chʼaʼaj. Baʼaleʼ, ¿baʼax kʼaʼabéet u beetaʼal kaʼach yéetel le baʼaloʼob yaan Jericooʼ? ¿Kʼajaʼan wa tech?

Kʼaʼabéet kaʼach u xuʼulsaʼaltiʼob, le oro yéetel le plataoʼ kʼaʼabéet u bisaʼal kaʼach tu tabernáculo Jéeoba. Le máakoʼob túunaʼ tsʼoʼok u maʼ uʼuyajtʼantkoʼob Dios. Tsʼoʼok yoklikoʼob baʼax utiaʼal Dios. U kʼaabaʼ le máakaʼ Acán, le yanoʼob yiknaloʼ u yatan yéetel u paalal. Koʼox ilik baʼax úuchi.

Tsʼokaʼaniliʼ u yookol Acán le ka túuxtaʼab máakoʼob baʼateʼel yéetel u kajnáaliloʼob Hai tumen Josueoʼ. Baʼaleʼ, tsʼáanchaʼataʼaboʼob. Yaan jujuntúul kíimoʼobiʼ, u maasiloʼobeʼ púutsʼoʼob. Lelaʼ tu beetaj u jach okʼom óoltal Josué. Ka chinlajeʼ, ka payalchiʼinaj tiʼ Jéeoba beyaʼ: ¿Baʼaxten ka chaʼik u yúuchul lelaʼ?

Jéeoba túuneʼ tu núukaj: ¡Líikʼen! Israeleʼ tsʼoʼok u kʼebantal. Tsʼoʼok u chʼaʼikoʼob baʼaloʼob kʼaʼabéet kaʼach u xuʼulsaʼaltiʼob wa u bisaʼaloʼob tin tabernáculo. Tsʼoʼok u yoklikoʼob upʼéel jatsʼuts nookʼ, ku tsʼoʼoleʼ maʼ u yaʼaloʼobiʼ. Le oʼolaleʼ, maʼ táan in wáantkeʼex wa maʼ ta xuʼulsikeʼex tiʼ le nookʼ yéetel tiʼ le máax okolt le baʼaloʼobaʼ. Jéeobaeʼ tiaʼalaj xan yaan u yeʼesik tiʼ Josué máax le j-ookoloʼ.

Josué túuneʼ tu muchʼaj tuláakal le kaajoʼ, ka eʼesaʼab tumen Jéeobaeʼ Acán le máax ookolnajaʼanoʼ. Acán túuneʼ tiaʼalaj: Tsʼoʼok in kʼebantal. Tin wilaj upʼéel jatsʼuts nookʼ, yéetel u xóotʼ oro, bey xan u xéexetʼal plata. Jach utschaj tin wichoʼobeʼ ka tin chʼaʼaj. Tiʼ in mukmajoʼob ichil in wotocheʼ, tiʼ jeʼel u páajtal a kaxtkeʼexeʼ.

Le ka kaxtaʼab le baʼaloʼobaʼ, taasaʼab tiʼ Josué; letiʼ túuneʼ tiaʼalaj tiʼ Acán: ¿Baʼaxten tsʼoʼok a taasiktoʼon talmil? ¡Beooraaʼ, Jéeobaeʼ yaan xan u taasiktech talmil! Tuláakal le máakoʼob túunoʼ tu chʼiʼinchʼinoʼob Acán paʼteʼ yéetel u familia tak ka kíimoʼob. Lelaʼ, ¿máasaʼ ku yeʼesik jach maʼ maʼalob ka k-chʼaʼa baʼaloʼob maʼ k-tiaʼaliʼ?

Ka tsʼoʼokeʼ, Israeleʼ bin tu kaʼatéen baʼateʼel yéetel u kajnáaliloʼob Hai. Teʼ kʼiin jeʼeloʼ, Jéeobaeʼ tu yáantaj u kaajal, le oʼolaleʼ tu ganartoʼob le baʼateloʼ.