¿AWOJEL wa baʼax ku xokik le chan x-chʼúupal yéetel uláakʼ paalaloʼobaʼ? Letiʼe libro ku xokkoʼob xanaʼ... U libroi tsikbaliloʼob tiʼ le Bibliaoʼ. Ku tsʼoʼoleʼ jach letiʼe tsikbalil xan ku xokkoʼobaʼ... «Bix jeʼel a kuxtal utiaʼal mantatsʼeʼ».

¿A wojel wa baʼax ku kankoʼob? Yáaxeʼ, utiaʼal ka kuxlak máak utiaʼal mantatsʼeʼ, kʼaʼabéet u kanik tiʼ Jéeoba yéetel tiʼ Jesús, u Paal. Le Bibliaoʼ kiaʼalik: Lelaʼ u bejil le kuxtal minaʼan u xuuloʼ. Ka kan tiʼe chéen utúuliliʼ jaajil Diosoʼ, yéetel tiʼ Jesucristo, u Paal.

¿Bix jeʼel k-kanik tiʼ Jéeoba yéetel tiʼ Jesuseʼ? Upʼéel bixeʼ, letiʼe k-láaj xokik U libroi tsikbaliloʼob tiʼ le Bibliaoʼ. Le libroaʼ yaʼab baʼaxoʼob ku kaʼansiktoʼon tiʼ Jéeoba yéetel tiʼ Jesús, ¿máasaʼ? Ku tʼaan xan tiʼe meyaj tsʼoʼok u beetkoʼoboʼ yéetel tiʼe ken u beetoʼoboʼ. Baʼaleʼ maʼ chéen letiʼe libro kʼaʼabéet k-xokikaʼaʼ.

¿Táan wa wilik le libro yaan luʼumoʼ? Letiʼe Bibliaoʼ. Wa maʼ wojel xookeʼ aʼal tiʼ wa máax ka u xoktech teʼ Biblia le tuʼux chʼaʼabaʼan le tsikbaliloʼob yaan teʼ libroaʼ. Le Bibliaoʼ ku kaʼansiktoʼon bix kʼaʼabéet k-meyajtik Jéeoba utiaʼal k-náajaltik le kuxtal utiaʼal mantatsʼoʼ. Le beetik kʼaʼabéet u jach suuktal k-xokik le Bibliaoʼ.

Baʼaleʼ maʼ chúukaʼan chéen ka k-kan tiʼ Jéeoba yéetel tiʼ Jesusiʼ. Jeʼel u páajtal k-ojéeltik yaʼab baʼaloʼob tiʼ letiʼob yéetel tiʼ u kaʼansajoʼobeʼ, baʼaleʼ tak yéetel leloʼ maʼ k-náajaltik le kuxtal minaʼan u xuuloʼ. ¿A wojel wa baʼax uláakʼ kʼaʼabéet k-beetik?

Kʼaʼabéet k-tsʼáaik t-kuxtal le baʼaxoʼob k-kankoʼ. ¿Kʼajaʼan wa tech Judas Iscariote? Letiʼ kaʼacheʼ utúul tiʼe doce yéeyaʼaboʼob tumen Jesús utiaʼal u beet u apóstoliloʼoboʼ. Judaseʼ jach yaʼab baʼax u yojel kaʼach tiʼ Jéeoba yéetel tiʼ Jesús. Baʼaleʼ, ¿baʼax úuch tiʼ? Ka máan kʼiineʼ, káaj u tsʼíiboltik taakʼineʼ ka tu kʼubaj Jesús yoʼolal treinta u taakʼinil plata. Le beetik Judaseʼ maʼ tu náajaltaj u kuxtal utiaʼal mantatsʼiʼ.

¿Kʼajaʼan wa tech úuchik k-kanik tiʼ Giezi teʼ tsikbalil 69? Letiʼeʼ taakchaj u chʼaʼik nookʼ yéetel taakʼin maʼ u tiaʼaliʼ. Tuusnaj yoʼolal u tiaʼalintik, ka castigartaʼab tumen Jéeoba. Letiʼeʼ yaan xan u castigarkoʼon wa maʼ k-beetik baʼax kiaʼalik u leyoʼob.

Baʼaleʼ yaan xan yaʼab máakoʼob jach chúukpaj u yóoloʼob u meyajtoʼob Jéeoba mantatsʼ. K-kʼáat beetba jeʼex letiʼobeʼ, ¿máasaʼ? Utúul tiʼ letiʼobeʼ chan Samuel. Kʼaʼajaktecheʼ, t-kanaj teʼ tsikbalil 55, letiʼeʼ chéen kampʼéel wa cinco jaʼab yantiʼ ka káaj u meyajtik Dios tu tabernáculo. Le oʼolaleʼ kex chichnecheʼ, maʼ u kʼáat yaʼal wa maʼ tu páajtal a meyajtik Diosiʼ.

Bey túunoʼ, tuláakloʼon k-kʼáat beet jeʼex tu beetaj Jesús tu paalileʼ. Jeʼex u yaʼalik le tsikbalil 87, Jesuseʼ tiaʼan teʼ templooʼ táan u tsikbaltik tiʼ uláakʼ máakoʼob baʼaloʼob yaan yil yéetel u Taata yaan teʼ kaʼanoʼ. Koʼoneʼex xan tsikbaltik tiʼ tuláakal máak le baʼaloʼob yaan yil yéetel k-kiʼichkelem Dios Jéeoba yéetel tiʼ Jesucristo. Wa k-beetik lelaʼ, yaan k-kuxtal utiaʼal mantatsʼ teʼ Luʼum sutaʼan paraísoiloʼ.