¿BAʼAX ka wilik teʼ dibujoaʼ? Yaʼabach soldadoʼob u natʼmaj u sak tsíimnoʼob. Baʼaleʼ ilawil tuʼux lukʼoʼob. ¡Le tsíimnoʼobaʼ áalkabil u yéemloʼob teʼ kaʼan yóokʼol le múuyaloʼoboʼ! ¿Yaan wa túun tsíimnoʼob teʼ kaʼanoʼ?

Minaʼan, le ka wilkoʼobaʼ maʼ jach tsíimnoʼobiʼ. Lelaʼ ku páajtal k-aʼalik, tumen le tsíimnoʼoboʼ maʼ tu páajtal u yáalkaboʼob yóokʼol le múuyaloʼ, ¿máasaʼ? ¿Baʼaxten túun kiaʼalik le Biblia yaan tsíimnoʼob teʼ kaʼanoʼ?

Tumen úuchjeakileʼ le tsíimnoʼoboʼ jach ku meyajoʼob utiaʼal le baʼateltáambaloʼoboʼ. Le Biblia túunoʼ utiaʼal u yeʼesik yaan u baʼateʼel Dios yéetel u kajnáaliloʼob le Luʼumaʼ, kiaʼalik yaan máaxoʼob ku yéemloʼob teʼ kaʼan yóokʼol u tsíimnoʼoboʼ. ¿Tuʼux kun úuchul? Teʼ Armagedonoʼ, tiʼ ken u xuʼuls tiʼ tuláakal le kʼaas ku beetaʼal teʼ Luʼumaʼ.

Jesús kun nuʼuktik le baʼatelaʼ. Kʼaʼajaktecheʼ Jéeobaeʼ u yéeymaj Jesús utiaʼal u beetuba reyil tiʼ u gobierno. Le oʼolal yaan u péet joʼol Jesús. U táatsʼ máaskaboʼ ku yeʼesik yaan u kíimsik tuláakal le máaxoʼob pʼekmai Diosoʼ. ¿Kʼaʼabéet wa u jaʼakʼal k-óol k-ojéeltik yaan u xuʼulsaʼal tiʼe j-kʼasaʼan máakoʼob tumen Diosoʼ?

Kaxt le tsikbalil 10. ¿Baʼax ka wilkiʼiʼ? Letiʼe nojoch Búulkabal xuʼuls tiʼe j-kʼasaʼan máakoʼobeʼ. ¿Máax taas le Búulkabaloʼ? Jéeoba Dios. Beooraaʼ il le tsikbalil 15. ¿Baʼax ku yúuchliʼiʼ? Jéeobaeʼ táan u beetik u kʼáaxal kʼáakʼ yóokʼol Sodoma yéetel Gomorra utiaʼal u xuʼulsiktiʼob.

Beooraaʼ il le tsikbalil 33. Ilawil baʼax ku yúuchul tiʼ u tsíimnoʼob yéetel u carroi u baʼateʼel le egipcioʼoboʼ. ¿Máax beet u búululoʼob? Láayliʼ Jéeobaeʼ. Lelaʼ tu beetaj utiaʼal u salvartik u kaajal. Kaxt le tsikbalil 76. Teʼeloʼ yaan a wilkeʼ Jéeobaeʼ tak u kaajal tu chaʼaj u xuʼulsaʼal tiʼ tumen tu beetoʼob baʼaloʼob kʼaastak.

Le oʼolaleʼ, maʼ unaj u jaʼakʼal k-óol k-ojéeltik yaan u túuxtik Jéeoba u ángeloʼob utiaʼal u xuʼulskoʼob tiʼ tuláakal le baʼax kʼaas ku beetaʼal yóokʼol le Luʼumaʼ. ¿Baʼax túun kun úuchul ken tsʼoʼokok? Koʼox kanik tuláakʼ tsikbaliloʼ.