Le palitsiltaʼan kaʼach le israelitaʼob Babiloniaoʼ, ilaʼab wa yaan u oksaj óoloʼob. Sadrac Mesac yéetel Abed-negoeʼ pulaʼaboʼob ich upʼéel orno jach chokoj, baʼaleʼ kanáantaʼaboʼob tumen Dios. Tsʼoʼok u chan máan kʼiin lúubuk Babilonia tu kʼab le medoʼob yéetel le persaʼoboʼ, Danieleʼ pulaʼab tu sajkab leónoʼob, baʼaleʼ Dioseʼ tu nupʼaj u chiʼ le leónoʼoboʼ.

Tu tsʼookeʼ, Ciro u reyil Persiaeʼ tu jáalkʼabtaj le israelitaʼoboʼ. Letiʼob túuneʼ suunajoʼob tu luʼumoʼob jach le ka tu tsʼáaj setenta jaʼaboʼob palitsiltaʼakoʼob Babiloniaoʼ. Upʼéel tiʼ le baʼaxoʼob tu káajsoʼob u beetkoʼob ka kʼuchoʼob Jerusalenoʼ, u templo Jéeoba. Baʼaleʼ maʼ xáanchaj ka jeʼelsaʼab le meyaj tumen le máaxoʼob pʼekmailoʼoboʼ. Bey túunoʼ veintidós jaʼaboʼob suunakoʼob Jerusalén ka tu tsʼoʼoksoʼob le templooʼ.

Ku tsʼoʼoleʼ yaan k-kanik bix úuchik u suut Esdras Jerusalén u jatsʼutskíint le templooʼ. Lelaʼ úuch cuarentai siete jaʼaboʼob tsʼoʼoksaʼak le templooʼ. Bey túunoʼ trece jaʼaboʼob suunak Esdraseʼ, Nehemíaseʼ áantajnaj xan utiaʼal u jel beetaʼal u baʼpakʼiloʼob Jerusalén. tak tiʼe kʼiinoʼob jeʼeloʼ yaan ciento cincuentai dos jaʼaboʼob tiʼ tsikbalil ich le JOʼO Jaatsaʼ.