ILAWIL baʼax ku yúuchul. Táan u jóoʼsaʼal Adán yéetel Eva teʼ jardín tiʼ Edenoʼ. ¿A wojel wa baʼaxten?

Tumen tu beetoʼob baʼax maʼ maʼalobiʼ. Le oʼolal táan u jóoʼsaʼaloʼob tumen Jéeoba. ¿A wojel wa baʼax tu beetoʼob Adán yéetel Eva?

Maʼ tu uʼuyajtʼantoʼob Diosiʼ. Dioseʼ tiaʼalajtiʼob jeʼel kaʼach u páajtal u jaantkoʼob u yich le cheʼob yaan teʼ jatsʼuts kúuchiloʼ. Baʼaleʼ, yaan u kúul cheʼ tiaʼalajtiʼob maʼ u jaantkoʼob u yich; wa ku jaantkoʼobeʼ yaan u kíimloʼob. Leloʼ chéen utiaʼal kaʼach Dios. Yéetel k-ojel maʼ uts u chʼaʼik máak upʼéel baʼal maʼ utiaʼaliʼ, ¿máasaʼ? Le oʼolaleʼ, ¿baʼax úuchi?

Upʼéel kʼiin tiaʼan Eva tu juunal teʼ jatsʼuts kúuchiloʼ, tʼaʼan tumen utúul kaan. ¡Máans ta tuukul! Le kaanoʼ tiaʼalaj tiʼ Eva ku jaant u yich le cheʼ aʼalaʼantiʼob maʼ u jaantkoʼobeʼ. Baʼaleʼ, ka beetaʼab le kaanoʼob tumen Jéeobaoʼ maʼ beetaʼaboʼob utiaʼal ka tʼaanakoʼobiʼ. Le oʼolaleʼ, yanji uláakʼ máax beet u tʼaan le kaanoʼ. ¿Máax túun?

Maʼ Adaniʼ. Le beetkeʼ, máax maas wa maʼ utúul tiʼe ángeloʼob beetaʼaboʼob tumen Dios maʼiliʼ u beet le Luʼumaʼ. Le ángeloʼobaʼ maʼ tu páajtal u yilaʼaloʼob. Utúul tiʼe ángeloʼobaʼ tu nojbaʼalkúuntuba. Káaj u tuklik kʼaʼabéet u beetkuba gobernantei jeʼex Dioseʼ, yéetel letiʼ bin kʼaʼabéet u yuʼubaʼal u tʼaan, maʼ Jéeobaiʼ. Letiʼ beet u tʼaan le kaanoʼ.

Le ángelaʼ páajchaj u tusik Eva. Le ka tiaʼalaj tiʼ wa ku jaantik u yich le cheʼoʼ, yaan u pʼáatal kaʼach bey Dioseʼ, Evaeʼ tu tuklaj jach jaaj le baʼax aʼalaʼabtiʼoʼ. Le beetkeʼ tu jaantaj, bey xan tu beetil Adán. Adán yéetel Evaeʼ maʼ tu yuʼuboʼob u tʼaan Diosiʼ, le oʼolal jóoʼsaʼaboʼob tu jatsʼuts otochoʼob, le jardinoʼ.

Baʼaleʼ, maʼ kun xáantaleʼ Dioseʼ yaan u jach jatsʼutskíintik tuláakal le Luʼum jeʼex le jardín tiʼ Edenoʼ. Tsʼoʼoleʼ yaan k-kanik bix jeʼel a táakpajal tiʼe meyajaʼ. Beooraaʼ koʼox ilik baʼax úuch tiʼ Adán yéetel Eva.