TULÁAKAL baʼal maʼalobeʼ tiʼ Dios u taal. Letiʼeʼ tu beetaj Kʼiin utiaʼal sáasilkunaj, tu beetaj xan Luna yéetel eekʼoʼob utiaʼal sáasilkunajoʼob tiʼ áakʼab. Tu beetaj xan le Luʼumaʼ utiaʼal ka kuxlakoʼoniʼ.

Baʼaleʼ, le Kʼiinoʼ, le Lunaoʼ, le eekʼoʼob yéetel le Luʼumoʼ maʼ le yáax beetaʼaboʼob tumen Diosiʼ. ¿A wojel wa baʼax? Ángeloʼob. Letiʼobeʼ maʼ tu páajtal k-ilkoʼob, jeʼex maʼ tu páajtal k-ilik Dioseʼ. Le Bibliaoʼ kiaʼalikeʼ beetaʼab le ángeloʼob tumen Dios utiaʼal ka kuxlakoʼob teʼ kaʼanoʼ.

Le yáax ángel tu beetaj Diosoʼ maʼ jeʼex u maasiloʼ. U yáax Paal; letiʼeʼ múul meyajnaj yéetel u Taata. Tu yáantaj u beet le Kʼiinoʼ, le Lunaoʼ, le eekʼoʼoboʼ, le Luʼumaʼ yéetel uláakʼ baʼaloʼob.

¿Bix túun kaʼach le Luʼumaʼ? Tu káajbaleʼ, mix máak kaʼach ku páajtal u kuxtaliʼ. Pixaʼan kaʼach tumen upʼéel nojoch kʼáaʼnáab. Baʼaleʼ, Dioseʼ u kʼáat kaʼach ka kuxlak máakoʼob teʼ Luʼumaʼ. Le oʼolaleʼ, káaj u maʼalobkíintik utiaʼal ka páatak k-kuxtaliʼ. ¿Baʼax tu beetaj?

Yáaxeʼ, kʼaʼabéet kaʼach sáasil tiʼe Luʼumaʼ. Le oʼolaleʼ, Dioseʼ tu beetaj u juul le Kʼiin yóokʼol le Luʼumaʼ utiaʼal ka páatak u yantal áakʼab yéetel kʼiin. Ku tsʼoʼoleʼ, tu beetaj u naʼakal le luʼum tu yóokʼol le kʼáaʼnáaboʼ.

Tu káajbaleʼ, mix baʼal kaʼach yaan teʼ luʼumaʼ. Bey kaʼach jeʼex u yeʼesik le dibujoaʼ. Minaʼan kaʼach looloʼob, cheʼob, mix baʼalcheʼobiʼ. Teʼ kʼáaʼnáaboʼ minaʼan kaʼach kayoʼobiʼ. Yaʼab meyaj kaʼach yaan u beet Dios utiaʼal ka páatak u yantal upʼéel jatsʼuts kuxtal tiʼ baʼalcheʼob bey xan tiʼ máakoʼob teʼ Luʼumaʼ.