WA KA taalak ta wiknal utúul máak táaj kaʼanal ku kʼuchul u pool tu joʼolnajil a wotocheʼ, ¿baʼax jeʼel a waʼalikeʼ? ¡Utúul sen kaʼanal bakel máak! Úuchileʼ teʼ Luʼumaʼ jach tu jaajil yanchaj máakoʼob sen kaʼanaltakoʼob. Le Bibliaoʼ kiaʼalikeʼ u taataʼobeʼ, ángeloʼob kaʼach teʼ kaʼanoʼ. Baʼaleʼ, ¿bix túun úuchik?

Kʼaʼajaktecheʼ, Satanás, le kʼasaʼan ángeleʼ táan kaʼach u beetik u yantal talmiloʼob. Tak kaʼach u ángeloʼob Dios ku yilik u kʼaskúuntik. Ka máan kʼiineʼ, jujuntúul ángeloʼobeʼ tu yuʼuboʼob u tʼaan Satanás. Tu pʼatoʼob le meyaj tsʼaʼantiʼob kaʼach tumen Dios teʼ kaʼanoʼ, ka éemoʼob way Luʼumeʼ tu sutubaʼob wíinikiloʼob. ¿A wojel wa baʼaxten?

Le Bibliaoʼ kiaʼalikeʼ letiʼobeʼ joʼopʼ u chaʼantkoʼob le x-chʼúupalaloʼob kiʼichpantakoʼob yanoʼob kaʼach teʼ Luʼumaʼ, le oʼolaleʼ taakchaj u kajtaloʼob yéeteloʼob. Ka túun éemoʼob utiaʼal ka tsʼoʼokok u beeloʼob tu yéeteloʼob. Le Bibliaoʼ kiaʼalikeʼ jach kʼaas le baʼax tu beetoʼoboʼ, tumen Dioseʼ tu beetaj le ángeloʼob utiaʼal kajtal teʼ kaʼanoʼ.

Ka joʼopʼ u yantal u chaambal u yatan le ángeloʼoboʼ jelaʼantakoʼob. Maʼ xaaneʼ tu káajbaleʼ maʼ jach jelaʼantakoʼobiʼ. Baʼaleʼ, ka joʼopʼ u nuuktaloʼobeʼ chéen minaʼan u xuul u bin u kaʼantaloʼob bey xan u yantal u muukʼoʼob, tak ka kʼuch u beetubaʼob sen kaʼanal bakel máakoʼob.

Le kaʼanal bakel máakoʼobaʼ jach kʼasaʼanoʼob kaʼachi. Tu yoʼolal jach nuuktakoʼob yéetel jach yaan u muukʼoʼobeʼ, jach ku beetkoʼob kʼaas tiʼ u yéet máakiloʼob kaʼach. U kʼáatoʼob kaʼach ka láaj kʼaschajak máak jeʼex letiʼobeʼ.

Ka tsʼoʼok u kíimil Enoqueʼ, tsʼoʼokiliʼ u yantal uláakʼ utsul máak teʼ Luʼumaʼ. U kʼaabaʼeʼ Noé. Letiʼeʼ mantatsʼ kaʼach ku beetik baʼax u kʼáat Dios.

Upʼéel kʼiineʼ, Dioseʼ tiaʼalaj tiʼ Noé tsʼoʼok u kʼuchul u kʼiinil u xuʼulsik tuláakal kʼasaʼan máakoʼob. Koʼox ilik bix úuchik u beetik.