¿YAAN wa baʼax jelaʼan ka wilik teʼ dibujoaʼ? Yaan, u máakiloʼob. Letiʼe yáax xiib yéetel yáax koʼoleloʼ. ¿Máax beetoʼob? Dios. ¿A wojel wa bix u kʼaabaʼ? U kʼaabaʼeʼ Jéeoba. Le xiib yéetel le koʼoleloʼ, Adán yéetel Eva tsʼaʼabik u kʼaabaʼob.

Jéeobaeʼ bey tu beetilak Adanaʼ: tu chʼaʼaj mamayki luʼum, yéetel lelaʼ, tu pataj upʼéel u jach maʼalob wíinklil xiib. Ku tsʼoʼoleʼ ka tu yustaj u niʼ, bey túunoʼ Adaneʼ káaj u kuxtal.

Dioseʼ tu tsʼáaj upʼéel meyaj tiʼ Adán. Tiaʼalajtiʼeʼ ka u tsʼáaj u kʼaabaʼ tuláakal le jejeláas baʼalcheʼoboʼ. Adaneʼ xáanchaj wal táan u kʼaj óoltik le baʼalcheʼob utiaʼal u tsʼáaik upʼéel maʼalob kʼaabaʼ tiʼoboʼ. Le ku beetkeʼ ka káaj u yilik upʼéel baʼal. ¿A wojel wa baʼax?

Tuláakal le baʼalcheʼoboʼ yaan u núupoʼob. Yaan xibil elefante yéetel x-chʼupul elefante, yaan xibil león yéetel x-chʼupul león. Baʼaleʼ Adaneʼ minaʼan kaʼach u núup. Le oʼolaleʼ, Jéeobaeʼ tu beetaj u tʼúubul u wenel Adán; ku tsʼoʼoleʼ, ka tu jóoʼsaj upʼéel u baakel u chʼalaʼatel. Yéetel túun le chʼalaʼatelaʼ, Jéeobaeʼ tu beetaj u yatan Adán.

¡Jach kiʼimakchaj yóol Adán! Eva xaneʼ ¡jach kiʼimakchaj yóol ikil tsʼaʼabik tiʼ upʼéel jatsʼuts kúuchil! Beoora túunaʼ, jeʼel kaʼach u páajtal u yantal u paalaloʼob yéetel u múuchʼ kuxtaloʼob ich kiʼimak óolaleʼ.

Jéeobaeʼ u kʼáat ka kuxlak Adán yéetel Eva kaʼach utiaʼal mantatsʼ. U kʼáat kaʼach ka u pʼatoʼob jatsʼutsil tuláakal le Luʼumaʼ, jeʼex le jardín tiʼ Edenoʼ. ¡Bukaʼaj wal kiʼimakchajik yóol Adán yéetel Eva ka tu tukloʼob yaan u beetkoʼob lelaʼ! Techeʼ, ¿jeʼel wa kaʼach u kiʼimaktal a wóol a táakpajal tiʼ u beetaʼal le Luʼum upʼéel jatsʼuts kúuchiloʼ? Baʼaleʼ, u kiʼimak óolal Adán yéetel Evaeʼ maʼ xáanchajiʼ. Koʼox ilik baʼaxten.