JEʼEX u bin u máan le kʼiinoʼoboʼ, Jesuseʼ yaʼab u téenel tsʼoʼok u chíikbeskuba tiʼ u j-tsaypachoʼob. Utéenjeakileʼ, Jesuseʼ tu chíikbesuba tiʼ 500 u j-kaambaloʼob. ¿A wojel wa baʼax tu kaʼansajtiʼob? U reino Dios. Lelaʼ letiʼ túuxtaʼab u beet tumen Jéeoba teʼ Luʼumaʼ. Tak ka tsʼoʼok u kaʼa kuxkíintaʼaleʼ tu beetaj le meyajaʼ.

¿Kʼajaʼan wa tech baʼax le Reinooʼ? Upʼéel gobierno ku taal tiʼ Dios. U reyil yéeyaʼan tumen Dioseʼ, Jesús. Le ka tu tséentaj yaʼab máakoʼob, le ka tu tsʼakaj kʼojaʼanoʼob yéetel le ka tu kaʼa kuxkíintaj kimenoʼobeʼ, Jesuseʼ tu yeʼesaj yaan u beetkuba utúul jach maʼalob rey.

Le oʼolaleʼ ken gobernarnak Jesús ich mil jaʼaboʼob teʼ kaʼanoʼ, ¿bix kun pʼáatal le Luʼumaʼ? Yaan u suʼutul upʼéel jatsʼuts paraísoi. Maʼ kun kaʼa antal baʼateltáambaloʼob, mix u beetaʼal kʼaas, mix kíimil. Lelaʼ k-ojel yaan u béeychajal tumen Jéeobaeʼ tu beetaj le Luʼum utiaʼal ka suʼutuk paraísoi utiaʼal u kajtal máakoʼobiʼ. Le oʼolal tu káajbaleʼ tu beetaj le jardín tiʼ Edenoʼ. Jesuseʼ yaan yilik xan ka béeyak le baʼax u kʼáat Diosoʼ.

Tsʼoʼok u kʼuchul u kʼiinil u kaʼa suut Jesús kaʼan. U j-kaambaloʼobeʼ u yojloʼob kuxaʼan tumen tsʼoʼok cuarenta kʼiinoʼob káajak u chíikbeskubatiʼob. Baʼaleʼ le maʼ xiʼik kaʼanoʼ tiaʼalajtiʼob: Pʼáatkeʼex tu kaajil Jerusalén a páaʼt a kʼamkeʼex u kiliʼich muukʼ Dios. Lelaʼ, u muukʼil u meyaj Dios, bey jeʼex le iikʼ ku péekoʼ, letiʼ kun áantik u j-tsaypachoʼob Jesús u beetoʼob le baʼax u kʼáat Diosoʼ. Tu tsʼookeʼ Jesuseʼ tiaʼalajtiʼob: Yaan a kʼaʼaytkeʼex in kʼaabaʼ tuláakal tuʼux.

Ka tsʼoʼok u yaʼalik lelaʼ, úuch upʼéel baʼal beet u jaʼakʼal u yóol le j-kaambaloʼoboʼ. Jeʼex a wilik teʼ dibujoaʼ Jesuseʼ káaj u naʼakal teʼ kaʼanoʼ. Ka tsʼoʼokeʼ pixaʼab tumen upʼéel múuyal, maʼ kaʼa ilaʼab tumen u j-kaambaloʼobiʼ. Ka kʼuch Jesús teʼ kaʼanoʼ joʼopʼ u gobernar yóokʼol u j-tsaypachoʼob yanoʼob teʼ Luʼumaʼ.