¿AWOJEL wa máax le máak lubaʼanoʼ? Saulo. Letiʼe máax kanáant u nookʼ le máakoʼob kíims Estebaneʼ. ¡Ilawil le sáasil ku sen juuloʼ! ¿Baʼax ku yúuchul?

Le tsʼoʼok u kíimil Estebanoʼ, Sauloeʼ tu chʼaʼapachtaj u j-tsaypachoʼob Jesús utiaʼal ku beet u kʼalaʼaloʼob. Tak ich najoʼob ku yokol u chukoʼob utiaʼal ku bisoʼob kʼalbil. Baʼaleʼ yaʼabeʼeʼ kʼiʼitpajoʼob táantanxel kaajoʼobeʼ, ka tu kʼaʼaytoʼob xan le maʼalob péektsiloʼoʼ. Baʼaleʼ Sauloeʼ bin xan tuláakʼ kaajoʼob u kaxt u j-tsaypachoʼob Jesús. Beooraaʼ táan u bin Damasco. Baʼaleʼ, teʼ bejoʼ, úuch le nojoch baʼal tiʼaʼ:

Chéen ka baʼpachtaʼab Saulo tumen upʼéel sáasil taal teʼ kaʼanoʼ. Letiʼeʼ lúub jeʼex k-ilik teʼelaʼ. Ka tu yuʼubaj upʼéel tʼaan: ¡Saulo, Saulo! ¿Baʼaxten ka chʼaʼapachken? Le máakoʼob ku binoʼob yéetel Saulooʼ tu yiloʼob le sáasiloʼ yéetel tu yuʼuboʼob xan le tʼaanoʼ, baʼaleʼ maʼ tu naʼatoʼobiʼ.

Sauloeʼ tiaʼalaj túun: ¿Máaxechiʼ, Yuumtsil?

Le tʼaanoʼ tiaʼalaj: Teen Jesús, le máax ka chʼaʼapachkoʼ. Jesuseʼ tiaʼalaj lelaʼ, tumen ken beetaʼak u muʼyaj u j-tsaypachoʼob tumen Sauloeʼ, ku yuʼubik bey tiʼ letiʼ ku beetaʼaleʼ.

Saulo túuneʼ tu kʼáataj: ¿Baʼax unaj in beetik Yuumtsil?

Jesuseʼ tiaʼalaj: Líikʼen, xeen tu kaajil Damasco. Teʼeloʼ tiʼ kun aʼalbiltech baʼax ken a beetiʼ. Ka líikʼ Saulo ka tu pʼilaj u yicheʼ, minaʼan u sáasil. ¡Chʼóopchajaʼan! Le beetkeʼ, machalkʼaʼatbi úuchik u bisaʼal tak Damasco tumen le máakoʼob u yéet binoʼ.

Jesús túuneʼ tu tʼanaj utúul u j-kaambal tu kaajil Damascoeʼ, ka tiaʼalajtiʼ: Ananías, líikʼen. Xeen teʼ bej kʼaj óolaʼan Toj bejoʼ. Xeen tu yotoch Judas a wil utúul máak ku kʼaabaʼtik Saulo. Tumen tsʼoʼok in yéeyik utiaʼal u beet upʼéel nojoch meyaj.

Ananíaseʼ binij. Ka kʼucheʼ tu tsʼáaj u kʼab yóokʼol Sauloeʼ, ka tiaʼalaj: Yuumtsileʼ, tsʼoʼok u túuxken utiaʼal ka in sut a sáasil yéetel utiaʼal ka chuʼupkech yéetel kiliʼich muukʼ. Tu séebaʼanileʼ baʼaloʼob bey sóoloʼob lukʼ tu yich Sauloeʼ, ka suunaj u sáasil.

Sauloeʼ jach noʼojaʼan utiaʼal kʼaʼaytaj tiʼe máakoʼob tiʼ jejeláas luʼumiloʼoboʼ. Apóstol Pablo kʼaj óoltaʼabik, yaan k-kanik xan maas tiʼ letiʼ. Baʼaleʼ, táanileʼ koʼox kanik baʼax tiaʼalaj Dios tiʼ Pedro ku beete.