¡ILAWIL baʼax tsʼoʼok u yúuchul teʼelaʼ! ¿Úuch wa nojoch loob tiʼe chan xiʼipal pekekba luʼumoʼ? ¡Utúul tiʼe máakoʼob ka wilik ku jóokʼol teʼ najoʼ Pablooʼ! ¿Táan wa wilik xan Timoteoiʼ? ¿Tiaʼan wa teʼ ventana le chan xiʼipal ka lúuboʼ?

Letiʼe baʼax úuchaʼ. Pabloeʼ táan u tsikbal u yuʼub u j-kaambaloʼob tu kaajil Troas. Letiʼeʼ yojel maʼ ken u séeb iloʼob tu kaʼatéen tumen ken sáaschajkeʼ yaan u bin tiʼ upʼéel cheem. Le beetik tu chukaj tak chúumuk áakʼab táan u tsikbal u yuʼuboʼob.

Le xiʼipal ku kʼaabaʼtik Euticooʼ tiʼ kulukbal kaʼach teʼ ventanaoʼ, ka weenij. ¡Yóokʼol óoxpʼéel piso yaan ka lúubij! Le oʼolal jach jakʼaʼan yóol le máakoʼobaʼ. Ka líiʼsaʼab le chan xiʼipalaʼ, le baʼax ku tuklikoʼoboʼ le uchaʼantiʼ. ¡Kimen!

Ka tu yilaj Pablo kimen le chan xiʼipalaʼ, ka chilaj tu yóokʼol utiaʼal u kʼíinkuntik u wíinklil. Ka túun tiaʼalaj: Maʼ u jaʼakʼal a wóoleʼex; ¡mix baʼal uchaʼantiʼ! ¡Lelaʼ jach jaaj! ¡Kaʼa kuxkíintaʼab tumen Pablo! Ka jach kiʼimakchaj yóol le máakoʼoboʼ.

Naʼakoʼob tu kaʼateneʼ ka jaanoʼob. Pablo túuneʼ tu chʼaʼajoʼoltaj u tsikbal tak ka sáaschaji. ¡Beooraaʼ maʼ túun kaʼa ween Euticoi! Ka tsʼoʼokeʼ, Pablo, Timoteo yéetel u yéet binoʼoboʼ naʼakoʼob teʼ cheemoʼ. ¿A wojel wa tuʼux ku binoʼob?

Pabloeʼ táan u tsʼoʼoksik u óoxpʼéel viajei u kʼaʼaytaj. Teʼ viajeaʼ óoxpʼéel jaʼab tu beetaj Efeso. Le beetkeʼ lelaʼ maas xáanchaj tiʼ u kaʼapʼéel viajeoʼ.

Ka jóokʼoʼob tu kaajil Troaseʼ, jeʼeloʼob tu kaajil Mileto u súutuk. Teʼeloʼ maʼ náach u taal Efesoi, Pablo túuneʼ tiaʼalaj tiʼe sukuʼunoʼob maas yaan u jaʼabiloʼob yanoʼob teʼ múuchʼulil yaan Efesooʼ, ka taalakoʼob Mileto utiaʼal ka tsikbalnak u tsʼoʼok utéen yéeteloʼob. Ka jóokʼ u bimbal le cheemoʼ, ¡jach yaachaj tu yóoloʼob úuchik u bin Pablo!

Le cheem túunoʼ suunaj tu kaajil Cesarea. Le tiaʼan Pablo tu yotoch utúul j-kaambal ku kʼaabaʼtik Felipeiʼ, profeta Agaboeʼ tiaʼalaj ken kʼuchuk Pablo Jerusaleneʼ yaan u kʼalaʼal cárcel. Le baʼax tiaʼalaj Agabooʼ le úuchi. Kaʼapʼéel jaʼab kʼaʼalak Pablo tu kaajil Cesarea, ka bisaʼab Roma utiaʼal pʼis óoltbil tumen César, u jalaʼachil Roma. Koʼox ilik baʼax úuch le táan u bisaʼal tu kaajil Romaoʼ.