Túuxtaʼab ángel Gabriel yiknal María utúul x-chʼúupal jach uts. Letiʼeʼ tiaʼalajtiʼ yaan u yantal utúul u chaambal kun reinar utiaʼal mantatsʼ. Le chaambaloʼ, Jesús, letiʼeʼ síij tuʼux ku kʼalaʼal baʼalcheʼob, tiʼ xan xíimbaltaʼab tumen le j-kanan tamanoʼoboʼ. Ku tsʼoʼoleʼ upʼéel eekʼ xaneʼ tu nuʼuktaj jujuntúul máakoʼob lakʼin u taaloʼob utiaʼal ka kʼuchkoʼob yiknal Jesús. Yaan k-kanik máax beet u chíikpajal le eekʼoʼ yéetel bix úuchik u kanáantaʼal Jesús utiaʼal maʼ u kíimsaʼal.

Tsʼoʼoleʼ, yaan xan k-ilik baʼax tu beetaj Jesús tsʼoʼok doce jaʼab tiʼ. Táan u tsikbal yéetel le j-kaʼansajoʼob teʼ templooʼ. Máan dieciocho  jaʼabeʼ ka tsʼaʼab u yokjaʼ Jesús, ka túun káaj u kʼaʼaytik yéetel u kaʼansik le reinooʼ, lelaʼ letiʼe meyaj túuxtaʼab u meent tumen Dios way Luʼumeʼ. Utiaʼal ka áantaʼak Jesús u beet le meyajaʼ, tu yéeyaj doce máakoʼob utiaʼal u beet u apóstoliloʼob.

Jesuseʼ tu beetaj xan yaʼab milagroʼob. Chéen yéetel upʼíit kay yéetel upʼíit waajeʼ tu tséentaj xan yaʼabach máakoʼob. Tu tsʼakaj xan kʼojaʼanoʼob yéetel tu líiʼsaj kimenoʼob. Tu tsʼookeʼ yaan k-kanik baʼaxoʼob sen úuch tiʼ Jesús tu tsʼook u kʼiiniloʼob u kuxtal, yéetel bix kíimsaʼabik. Jesuseʼ óoxpʼéel jaʼab kaʼa tak táankoch kʼaʼaytajnaji, le beetik ichil le WAK Jaatsaʼ yaan maas tiʼ treintai cuatro u jaʼabil tsikbaliliʼ.