96 TSIKBALIL
Jesuseʼ ku tsʼakik kʼojaʼanoʼob
LE TÁAN u xíimbaltik Jesús u luʼumil Israeloʼ táan u bin u tsʼakik le kʼojaʼanoʼoboʼ. U tsikbalil le nukuch baʼaloʼob tu beetoʼ ojéeltaʼab xan tak teʼ kaajoʼob yanoʼob naatsʼoʼ. Le oʼolal taasaʼab yiknal Jesús yaʼab máakoʼob móoch u wíinkliloʼob, chʼóopoʼob yéetel uláakʼ máakoʼob yaan jejeláas talmil tiʼob. Jesús túuneʼ tu láaj tsʼakoʼob.
Tsʼoʼok u máan maas tiʼ óoxpʼéel jaʼab tsʼaʼabak u yokjaʼ Jesús tumen Juan. Jesús túuneʼ tiaʼalaj tiʼ u apóstoloʼobeʼ maʼ tu xáantal ken xiʼik tu kaajil Jerusalén, teʼeloʼ tiʼ kun kíimsbiliʼ, baʼaleʼ maʼ kun pʼáatal ichil le kimenoʼoboʼ. Le maʼ úuchuk lelaʼ, letiʼeʼ láayliʼ táan u tsʼakik le kʼojaʼanoʼoboʼ.
Utéenjeakileʼ Jesuseʼ táan u kaʼansaj tu kʼiinil sábado. Sábadoeʼ u kʼiinil u jeʼelel le judíoʼoboʼ. Le koʼolel ka wilik teʼelaʼ dieciocho jaʼab kaʼach wúutsʼuk u paach, maʼ tu páajtal kaʼach u tojtal. Le beetikeʼ, Jesuseʼ tu tsʼáaj u kʼaboʼob yóokʼol le koʼoleloʼ, le koʼolel túunaʼ tojchaj u wíinklileʼ, ¡ka utschaji!
Lelaʼ tu beetaj u kʼuuxil u nuuktakil le j-kʼiinoʼoboʼ. Utúul tiʼobeʼ tu kʼaʼam aʼalaj tiʼe yaʼabach máakoʼoboʼ: Yaan seis kʼiin utiaʼal u yúuchul meyaj, ¡letiʼ u kʼiiniloʼob utiaʼal u taal máak u tsʼakuba, maʼ tiʼ sábadoiʼ!
Baʼaleʼ Jesuseʼ tu núukaj: ¡Kʼasaʼan máakeʼex! Jeʼel máaxak tiʼ teʼexeʼ jeʼel u jáalsuntik u burro ka u bis yukʼ jaʼ tu kʼiinil sábadoeʼ. Le beetikeʼ, ¿maʼ wa unaj u tsʼaʼakal le óotsil koʼolel tsʼoʼok dieciocho jaʼaboʼob kʼojaʼanchakaʼ? Lelaʼ tu beetaj u suʼlaktal le kʼasaʼan máakoʼoboʼ.
Ka tsʼoʼokeʼ, Jesús yéetel u apóstoloʼobeʼ binoʼob Jerusalén. Ka náatsʼoʼob tu kaajil Jericoeʼ, tiaʼan kaʼatúul máakoʼob chʼóoptakiʼ ka tu yawtoʼob: Jesús, chʼaʼatoʼon óotsilil.
Jesús túuneʼ tu tʼanaj le kaʼatúul máakoʼobaʼ ka tu kʼáatajtiʼob: ¿Baʼax a kʼáateʼex ka in beetteʼex? Letiʼobeʼ tu yaʼaloʼob: Yuumtsil, beet u páajtal k-paakat. Machaʼab u yichoʼob tumen Jesús, ¡tu séebaʼanil páajchaj u paakatoʼob! ¿A wojel wa baʼaxten tu beetaj Jesús le milagroʼobaʼ? Tumen u yaabilma le máakoʼoboʼ yéetel u kʼáat ka oksaj óoltaʼak. Lelaʼ ku yeʼesiktoʼoneʼ, ken u gobernart Jesús le Luʼumaʼ mix máak kun kaʼa kʼojaʼantal.