87 TSIKBALIL
Le ka pʼáat jesús teʼ templooʼ
ILAWIL le xiʼipal ku tsikbal yéetel le nukuch máakoʼobaʼ. Letiʼob ku kaʼansajoʼob tu templo Dios yaan Jerusalenoʼ. Le xiʼipalaʼ Jesús, tsʼoʼok u nojochtal. Doce jaʼaboʼob yaan tiʼ.
Le j-kaʼansajoʼobaʼ jach jaʼakʼ u yóoloʼob ka tu yiloʼob jach yaʼab baʼax u yojel Jesús tiʼ Dios yéetel tiʼe baʼaxoʼob tsʼíibtaʼan teʼ Bibliaoʼ. Baʼaleʼ, ¿baʼaxten minaʼan José yéetel María teʼelaʼ? ¿Tuʼux yanoʼob? Koʼox ilik.
Láalaj jaʼabeʼ José yéetel u familiaeʼ ku binoʼob tu kaajil Jerusalén utiaʼal ku kʼiimbesoʼob le Pascuaoʼ. Jach náach u xíimbalil Nazaret tak Jerusalén. Úuchjeakileʼ minaʼan camionoʼob mix trenoʼob. Maas yaʼab máak xíimbalil u máan, tiʼ letiʼobeʼ tu bisaj óoxpʼéel kʼiin u kʼuchloʼob Jerusalén.
Teʼ kʼiinoʼob jeʼeloʼ Joseiʼ tsʼoʼok u yaʼabtal u paalal, le oʼolal kʼaʼabéet u maas kanáantik le chichnoʼoboʼ. Teʼ jaʼab túunaʼ, José yéetel Maríaeʼ táan u suutoʼob yéetel u paalaloʼob tu kaajil Nazaret, ku tuklikoʼobeʼ tiaʼan Jesús ichil u maasil máakoʼob ku suutoʼob xanoʼ. Baʼaleʼ ka jeʼeloʼob táan u chíinil kʼiineʼ, maʼ tu yiloʼobiʼ. ¡Ka joʼopʼ u kaxkoʼob ichil u láakʼtsiloʼob yéetel ichil le máaxoʼob u kʼaj óoloʼoboʼ, baʼaleʼ minaʼaniʼ! Ka yanchaj u suutoʼob Jerusalén u kaxtoʼob.
Tiʼ túun tu yiloʼobiʼ. Táan u jach uʼuyik u tsikbal le máaxoʼob ku kaʼansajoʼoboʼ yéetel táan xan u beetik kʼáatchiʼob tiʼ letiʼob. Le máakoʼob yanoʼob xanoʼ jach jaʼakʼ u yóoloʼob ka tu yiloʼob jach yaan u naʼat Jesús. Baʼaleʼ Maríaeʼ tiaʼalajtiʼ: In paal, ¿baʼaxten ta beetatoʼon lelaʼ? Teen yéetel a taataeʼ tsʼoʼok k-sen máan kaxtech yéetel yaayaj óolal.
Jesuseʼ tu núukaj: ¿Baʼaxten túun ka sen máan a kaxteneʼex? ¿Maʼ wa wojeleʼex tu yotoch in taata kʼaʼabéet in wantaliʼ?
Lelaʼ ku yeʼeskeʼ, Jesuseʼ utstutʼaan u bin tuʼux ku kaambal tiʼ Dios. Toʼon xaneʼ kʼaʼabéet k-beetik beyoʼ, ¿máasaʼ? Jesuseʼ ku bin láalaj semana teʼ muchʼtáambaloʼob ku beetaʼal tu kaajil Nazaret utiaʼal u adorartaʼal Diosoʼ. Jesuseʼ jach ku chʼenxikintik baʼax ku kaʼansaʼaliʼ, le oʼolal yaʼab baʼax tu kanaj teʼ Bibliaoʼ. Toʼon xaneʼ kʼaʼabéet k-beetik jeʼex tu beetaj Jesusoʼ.