98 TSIKBALIL
Tu witsil Olivoʼob
LE MÁAKAʼ Jesús, tiaʼan tu witsil Olivoʼobeʼ. Le kantúul máakoʼob yaan yiknaloʼ, u apóstoloʼob. Letiʼe sukuʼuntsiloʼob Andrés yéetel Pedroeʼ, yéetel sukuʼuntsiloʼob Santiago yéetel Juan. Le nojoch naj ka wilikoʼ u templo Dios yaan Jerusalén.
Tsʼoʼok u máan kaʼapʼéel kʼiin okok Jesús tu kaajil Jerusalén yóokʼol le chan burroeʼ. Bejlaʼeʼ martes. Tu jaʼatskabileʼ Jesuseʼ bin teʼ templooʼ. Teʼeloʼ tiʼ óotaʼab kíimsbil tumen le j-kʼiinoʼoboʼ. Baʼaleʼ tu chʼaʼob saajkil tumen Jesuseʼ ku lúubul utsil tiʼe máakoʼoboʼ.
Jesuseʼ tiaʼalaj tiʼ u nuuktakil le j-kʼiinoʼoboʼ: ¡Kaaneʼex, u chʼiʼibaleʼex kaan! Tiaʼalaj xan tiʼob yaan u castigartaʼaloʼob tumen Dios yoʼolal tuláakal le baʼaloʼob kʼaastak tsʼoʼok u beetkoʼoboʼ. Ka tsʼoʼokeʼ, Jesuseʼ naʼak tu witsil Olivoʼob, ka joʼopʼ u beetaʼal kʼáatchiʼob tiʼ tumen le kantúul apóstoloʼoboʼ. ¿A wojel wa baʼax tu kʼáatoʼob?
Le apóstoloʼoboʼ táan u kʼáatkoʼob tiʼ Jesús baʼax ku taal u kʼiin yúuchul. U yojloʼobeʼ Jesuseʼ yaan u xuʼulsik u beetaʼal baʼaloʼob kʼaastak way Luʼumeʼ. Baʼaleʼ u kʼáat yojéeltoʼob baʼax kʼiin ken úuchuk. ¿Baʼax kʼiin ken kaʼa taalak Jesús utiaʼal gobernar?
Jesuseʼ u yojel ken kaʼa taalakeʼ, maʼ kun ilbil tumen u j-tsaypachoʼob. Tumen letiʼeʼ teʼ kaʼan kun antaloʼ. Le oʼolal túun Jesuseʼ tiaʼalaj tiʼ u apóstoloʼob baʼax kun sen úuchul teʼ Luʼum ken káajak u reinar teʼ kaʼanoʼ. ¿Máakalmáak jujumpʼéel tiʼobiʼ?
Jesuseʼ tiaʼalaj yaan u yantal nukuch baʼateltáambaloʼob, yaʼab máak kun kʼojaʼantal yéetel ken u muʼyajtoʼob wiʼijil, yaan u sen kíimsaʼal máakoʼob yéetel yaan u tíitkuba le luʼumoʼ. Tiaʼalaj xan yaan u kʼaʼaytaʼal u maʼalob péektsilil u reino Dios tu yóokʼol tuláakal le Luʼumaʼ. Teʼ kʼiinoʼobaʼ, ¿táan wa k-ilik u yúuchul tuláakal le baʼaloʼobaʼ? ¡Táan! Tumen Jesuseʼ tsʼoʼok u káajal u reinar teʼ kaʼanoʼ. Maʼ kun xáantal ken u xuʼuls tuláakal le kʼaas ku sen beetaʼal yóokʼol le Luʼumaʼ.