¿AKʼAJ ÓOL wa le x-kiʼichpam koʼolel ku taal yiknal Davidaʼ? U kʼaabaʼeʼ, Abigail. Letiʼeʼ jach yaan u naʼat; tu yáantaj David utiaʼal maʼ u beetik baʼax kʼaas. Baʼaleʼ, táanileʼ koʼox ilik bix u bin tiʼ David.

Ku tsʼoʼokol u púutsʼul David tiʼ Sauleʼ, bin u taʼakuba ich upʼéel sajkab. U sukuʼunoʼob yéetel u maasil u láakʼtsilileʼ taaloʼob tu yiknal. Taal xan 400 máakoʼobiʼ; David túuneʼ kʼuch u beetuba u joʼolpóopiloʼob. Ka tsʼoʼokeʼ, Davideʼ bin yiknal u reyil Moab ka tiaʼalajtiʼ: Beet uts a chaʼik u pʼáatal in taata yéetel in mama ta wiknal tak ken in wil baʼax kun úuchulten. Ka tsʼoʼokeʼ, David yéetel u soldadoʼobeʼ joʼopʼ u máan u taʼakkubaʼob teʼ witsoʼoboʼ.

Ka máan tsʼeʼetsʼek kʼiineʼ, Davideʼ tu kʼaj óoltaj Abigail. U yíichameʼ Nabal, utúul ayikʼal máak yaan yaʼab u kʼaax. Yaan xan 3.000 u tamanoʼob yéetel 1.000 u yalakʼ chivoʼob. Nabaleʼ jach kʼasaʼan. Baʼaleʼ, Abigail u yataneʼ, jach uts. U yojel xan u beet baʼax maʼalob. Utéenjeakileʼ tu salvartaj u familia. Koʼox ilik bix úuchik u beetik.

David yéetel u soldadoʼobeʼ tsʼoʼok u yeʼesik u yutsiloʼob tiʼ Nabal. Tu yáantoʼob u kanáant u tamanoʼob. Upʼéel u kʼiinileʼ, Davideʼ tu túuxtaj u soldadoʼob kʼáatik tiʼ Nabal ka u beet upʼéel uts tiʼob. Ka kʼuchoʼobeʼ, Nabal yéetel u j-meyajoʼobeʼ táan u kʼoskoʼob u tsoʼotsel le tamanoʼoboʼ. Táan xan u beetkoʼob upʼéel kʼiimbesaj, tiʼ Nabaleʼ yaan yaʼab baʼaloʼob maʼalobtak utiaʼal jaantbil. Le beetik u soldadoʼob Davideʼ tiaʼaloʼobtiʼ: Tsʼoʼok eʼesik k-utsil tech. Maʼ t-okoltaj mix utúul a tamaniʼ, baʼaleʼ t-áantech a kanáantoʼob. Le oʼolaleʼ beet uts a síiktoʼon upʼíit janal.

Nabaleʼ tiaʼalaj: Maʼ táan in síik janal tiʼ máakoʼob jeʼex teʼexeʼ. Nabaleʼ kʼaakʼas tʼaanaji, tiaʼalaj xan baʼaloʼob kʼaastak tiʼ David. Davideʼ jach kʼuuxilnaj ka aʼalaʼab tiʼ tumen u soldadoʼob baʼax tiaʼalaj Nabal. David túuneʼ tiaʼalaj: ¡Kʼaxnakʼteʼex a táatsʼ máaskabeʼex! Ka túun bin u kíimsoʼob Nabal paʼteʼ yéetel u j-meyajoʼob.

Utúul tiʼ u j-meyajoʼob Nabaleʼ, le ka tu yuʼubaj bix úuchik u tʼaan u tsʼuulileʼ, ka bin u yaʼal tiʼ Abigail baʼax tsʼoʼok u yúuchul. Abigaileʼ tu séebaʼanil tu beetaj janaleʼ, ka tu tsʼáaj yóokʼol jujuntúul burroʼobeʼ, ka binij. Ka tu yiluba teʼ bej yéetel Davidoʼ, ka éem tu burroeʼ ka chinlaj tu táan Davideʼ ka tiaʼalaj: In tsʼuulil, beet uts a saʼasik baʼax tiaʼalaj in wíicham Nabal, maʼ pʼuʼujul. Letiʼeʼ j-maʼ naʼat, chéen ku jáan tʼaan. Tin taasajtech upʼéel siibal. Beet uts a chʼaʼik, yéetel saʼastoʼon le baʼax tsʼoʼok u yúuchloʼ.

Davideʼ tu núukaj: Jach yaan a naʼat, tsʼoʼok a beetik maʼ in kíimsik Nabal yoʼolal u kʼasaʼanil. Beooraaʼ suunen ta wotoch yéetel jeetsʼelil. Ka túun kíim Nabaleʼ, Abigaileʼ tsʼoʼok u beel yéetel David.