LE KA tsʼoʼok u kíimsik Goliateʼ, Davideʼ bisaʼab yiknal Saúl tumen Abner, u nojchil u soldadoiloʼob Israel. Sauleʼ tu beetaj David utúul u nojchil tiʼ u soldadoʼob, tu beetaj xan u pʼáatal kajtal tu yotoch.

Le ka suunaj le soldadoʼob tsʼoʼok u baʼateloʼob yéetel le filisteoʼoboʼ, le koʼoleloʼoboʼ tu kʼayoʼob: Sauleʼ tsʼoʼok u kíimsik u milesi, baʼaleʼ Davideʼ tsʼoʼok u kíimsik u diez milesi. Sauleʼ kʼuuxilnaji, tumen maas yaʼab nojbeʼenil tsʼaʼab tiʼ David. Baʼaleʼ Jonatán u paal Sauleʼ maʼ kʼuuxilnajiʼ. U yaabilma David, letiʼ xaneʼ yaabiltaʼan tumen David. Le oʼolal tu chʼaʼatʼantoʼob u paklan biskubaʼob mantatsʼ.

Davideʼ jach u yojel u pax arpa; Sauleʼ jach jatsʼuts u yuʼubik u paax David. Baʼaleʼ utéeneʼ, Sauleʼ tu yóotaj u beet loob tiʼ David, tumen káaj u pʼektik. Le táan u paxik le arpaoʼ, Sauleʼ tu chʼaʼaj u lóomteʼiʼ ka tu chʼinaj David táan u yaʼalik: ¡In kaʼaj in baj David teʼ pakʼoʼ! Baʼaleʼ Davideʼ tu jechaj. Ka máan kʼiineʼ, Sauleʼ tu kaʼa máan chʼintaj David yéetel u lóomteʼ. David túuneʼ tu yileʼ jach kʼaʼabéet u kanáantkuba tuláakal súutukil.

¿Kʼajaʼan wa tech le baʼax tiaʼalaj Sauleʼ? Letiʼeʼ tiaʼalaj yaan u tsʼoʼoksik u beel utúul u x-chʼupul paal yéetel le máax kun kíimsik Goliateʼ. Saúl túuneʼ tiaʼalaj tiʼ David jeʼel u páajtal u tsʼoʼokol u beel yéetel Mical, u paaleʼ, baʼaleʼ táanileʼ kʼaʼabéet u kíimsik 100 filisteoʼob. ¡Baʼaleʼ baʼax u kʼáat Sauleʼ ka kíimsaʼak David tumen le filisteoʼoboʼ! Chéen baʼaleʼ Davideʼ maʼ kíimsaʼabiʼ, le beetikeʼ Sauleʼ tu tsʼoʼoksaj u beel yéetel Mical.

Utéenjeakileʼ Sauleʼ tiaʼalaj tiʼ Jonatán yéetel tiʼ tuláakal u j-meyajoʼob u kʼáat u kíims David. Baʼaleʼ Jonataneʼ tiaʼalajtiʼ: Maʼ beetik loob tiʼ David. Letiʼeʼ mix utéen u beettech kʼaas. Tsʼoʼok tak u yáantkech. Tu tsʼáaj u kuxtal tu táan kíimil le ka tu kíimsaj Goliateʼ; ka ta wilaj baʼax tu beeteʼ kiʼimakchaj a wóol.

Sauleʼ tu yuʼubaj u tʼaan u paal, ka tiaʼaleʼ maʼatan u beetik loob tiʼ David. Ka taasaʼab David tu kaʼatéeneʼ, ka joʼopʼ u meyajtik Saúl jeʼex kaʼachileʼ. Chéen baʼaleʼ, upʼéel u kʼiinil táan u paax Davideʼ, Sauleʼ tu yóotaj u kaʼa chʼin yéetel u lóomteʼ. Baʼaleʼ Davideʼ tu kaʼa jechaj; le lóomteʼoʼ chʼíik teʼ pakʼoʼ. ¡U yóoxtéenoʼ! ¡Beoora túunaʼ Davideʼ tu yilaj kʼaʼabéet u púutsʼul!

Tiʼe áakʼab jeʼeloʼ Davideʼ bin tu yotoch, baʼaleʼ Sauleʼ tu túuxtaj máakoʼob kíimsik. Micaleʼ u yojel baʼax u kʼáat u beet u taata. Le oʼolal tiaʼalaj tiʼ David: Púutsʼkech teʼ áakʼabaʼ, wa maʼeʼ sáamaleʼ kimenech. Tiʼe áakʼab jeʼeloʼ Micaleʼ tu yáantaj David ka jóokʼok tu ventanai u yotochoʼob utiaʼal ka púutsʼuk. Óoliʼ siete jaʼaboʼob táan u máan u taʼakkuba David tiʼ Saúl.