WA KA kíimkecheʼ, ¿bix jeʼel u yuʼubikuba a mama wa ka kaʼa kuxlakecheʼ? Jeʼel u jach kiʼimaktal yóoleʼ, ¿máasaʼ? Baʼaleʼ, ¿jeʼel wa u páajtal u kaʼa kuxtal máax tsʼoʼok u kíimleʼ? Lelaʼ, ¿yáax uchaʼan wa?

Ilawil le máakoʼ, le koʼoleloʼ yéetel le chan xiʼipal yanoʼob teʼ dibujoaʼ. Le máakoʼ profeta Elías. Le koʼoleloʼ utúul x-sareptai kimen u yíicham, le chan xiʼipaloʼ u paal. Upʼéel u kʼiinileʼ le chan xiʼipaloʼ kʼojaʼanchaji. Jach maaschajeʼ ka kíimi. Elías túuneʼ tiaʼalaj tiʼe koʼoleloʼ: Tsʼáaten le chan xiʼipaloʼ.

Elías túuneʼ, tu bisaj le chan xiʼipal tiʼ upʼéel cuarto yaan kaʼanaloʼ ka tu chikúuntaj. Ka payalchiʼinaj beyaʼ: Jéeoba, beet u kaʼa kuxtal le chan xiʼipalaʼ. ¡Le chan xiʼipal túunoʼ káaj u chʼaʼik yiikʼ! Elías túuneʼ éem yéeteleʼ ka tiaʼalaj tiʼe koʼoleloʼ: ¡Ile, a paaleʼ kuxaʼan! Le koʼolel túunoʼ jach kiʼimakchaj yóol.

Uláakʼ utúul u profeta Jéeoba jach kʼaj óoltaʼabeʼ, Eliseo. Letiʼ áantik kaʼach Elías. Ka máan kʼiineʼ, tsʼaʼab xan u páajtalil tiʼ tumen Jéeoba utiaʼal u beetik milagroʼob. Upʼéel u kʼiinileʼ bin tu kaajil Sunem, teʼeloʼ tiʼ kajaʼan utúul koʼolel jach utsiʼ. Le koʼolelaʼ ka máan kʼiineʼ yanchaj utúul u paal.

Upʼéel u kʼiinil tsʼoʼok u chan nojochtal le chan xiʼipalaʼ, bin teʼ kʼáax tuʼux ku meyaj u taataoʼ. Chéen ka joʼopʼ u yawat aʼalik: ¡Jach táaj yaj u kʼiʼinam in pool! Ka bisaʼab tu yotocheʼ tiʼ kíimiʼ. ¡Bukaʼaj úuchik u okʼom óoltal u mama! Ka bin tu séebaʼanil u kaxt Eliseo.

Ka kʼuch Eliseoeʼ, ook teʼ cuarto tuʼux yaan le chan xiʼipal kimenoʼ. Letiʼ túuneʼ payalchiʼinaj tiʼ Jéeoba, tsʼoʼoleʼ ka chilaj yóokʼol le kimenoʼ. Maʼ xáanchaj ka kʼíinchaj u wíinklil le chan xiʼipaloʼ, ka jeʼesíimnaj siete u téenel. ¡Bukaʼaj úuchik u kiʼimaktal yóol u mama ka ook ka tu yilaj kuxaʼan le chan xiʼipaloʼ!

Yaʼabach máakoʼob tsʼoʼok u kíimil. Lelaʼ tsʼoʼok u beetik u okʼom óoltal u láakʼtsililoʼob bey xan le máaxoʼob ku biskubaʼob yéeteloʼob kaʼachoʼ. Toʼoneʼ maʼ tu páajtal k-kaʼa kuxkíintik kimenoʼob. Baʼaleʼ Jéeobaeʼ jeʼel u páajtal u beetkeʼ. Tuláakʼ tsikbaliloʼobeʼ, yaan k-kanik bix ken u kaʼa kuxkíint le yaʼabach máakoʼob kimenoʼoboʼ.