SAULEʼ táan kaʼach u yilik u kaʼa chukik David. Tu bisaj 3.000 u maas muʼukʼaʼanil u soldadoʼob kaxtik. Ka tu yojéeltaj David le jeʼelaʼ, tu túuxtaj máakoʼob ilik tuʼux jelekbal Saúl tiʼe áakʼaboʼ. Ku tsʼoʼoleʼ, Davideʼ tu kʼáataj tiʼ kaʼatúul u soldadoʼob: ¿Máax kun bin tin wéetel teʼ tuʼux yaan Sauloʼ?

Abisaieʼ tu núukaj: Teen kin bin ta wéetel. U mama Abisaieʼ Sarvia (Zeruyá), u kiik David. Le táan u weenloʼob Saúl yéetel u soldadoʼoboʼ, David yéetel Abisaieʼ ookoʼob teʼ tuʼux yanoʼoboʼ. Ka tu chʼaʼajoʼob u lóomteʼ yéetel u chúujil u yoʼoch jaʼ Saúl yaan kaʼach tu tséel u pool. Mix máak iloʼob yéetel mix máak uʼuyoʼob tumen jach tʼuubul u weenloʼob.

Beooraaʼ, ilawil David yéetel Abisai. Tsʼoʼok u púutsʼloʼob, tiaʼanoʼob yóokʼol upʼéel witseʼ. Davideʼ tu kʼaʼam tʼantaj u nojchil u soldadoiloʼob Israel: Abner, ¿baʼaxten maʼ táan a kanáantik a tsʼuulil, le reyoʼ? ¿Tuʼux tsʼoʼok u lóomteʼ yéetel u chúujil u yoʼoch jaʼ?

Ka túun aaj Saúl. Letiʼeʼ tu kʼaj óoltaj u tʼaan David, ka tu kʼáatajtiʼ: ¿Teech wa, David? Teʼ tuláakʼ dibujooʼ jeʼel u páajtal a wilik tiaʼan Saúl yéetel Abnereʼ.

Davideʼ tu núukaj: Teen, in tsʼuulil. Ka tsʼoʼokeʼ Davideʼ tu kʼáataj: ¿Baʼaxten a kʼáat a chuken? ¿Baʼax kʼaasil tsʼoʼok in beetik? Way yaan a lóomteʼiʼ, in rey. Taalak wa máax chʼaʼik.

Sauleʼ tiaʼalaj: Maʼ maʼalob baʼax tsʼoʼok in beetkiʼ, yéetel x-maʼ naʼatil tin beetaj. Ka tsʼoʼokeʼ Davideʼ binij, Saúl túuneʼ suunaj tu yotoch. Baʼaleʼ Davideʼ tu máansaj tu tuukul: Upʼéel kʼiin tiʼe jeʼeloʼobaʼ Sauleʼ yaan u kíimsken. Kʼaʼabéet in bin tu kaajal le filisteoʼoboʼ, bey úuchik u beetkoʼ. Davideʼ páajchaj u tusik le filisteoʼoboʼ, tu beetaj u tuklikoʼob u kaʼaj u yáantoʼob.

Ka chan máan kʼiineʼ le filisteoʼoboʼ binoʼob baʼateʼel yéetel Israel. Teʼ baʼateloʼ tiʼ kíim Saúl yéetel Jonataniʼ. Lelaʼ tu beetaj u okʼom óoltal David, ka túun tu tsʼíibtaj upʼéel jatsʼuts kʼaay tuʼux kiaʼalik: Jach okʼom óolen ta woʼolal, in sukuʼun, Jonatán. ¡Bukaʼaj in yaabiltmailech kaʼachi!

Ka tsʼoʼok lelaʼ, Davideʼ suunaj Israel, tu noj kaajil Hebrón. Teʼeloʼ tiʼ ku baʼateʼel le máakoʼoboʼ, tumen táan u yéeykoʼob Is-boset, u paal Saúl utiaʼal u beetuba reyil, baʼaleʼ uláakʼ máakoʼobeʼ u kʼáatoʼob David ka u beetuba reyil. Ka tsʼoʼokeʼ le máakoʼob yanoʼob tu tséel Davidoʼ ganarnajoʼob. Davideʼ 30 jaʼaboʼob yaan tiʼ ka kʼuch u beetuba reyil. Gobernarnaj siete jaʼaboʼob kaʼa tak táankoch tu kaajil Hebrón. Leloʼobaʼ letiʼe u paalal David síijoʼob tu kaajil Hebronoʼ: Amnón, Absalón yéetel Adonías.

Ka máan kʼiineʼ David yéetel u soldadoʼobeʼ tu chʼaʼajoʼob u kiʼichkelem kaajil Jerusalén. Le máax nuʼuktik le baʼateloʼ Joab, uláakʼ utúul u paal Sarvia, u kiik David. Le oʼolal tsʼaʼab tumen David u beetuba u nojchil le soldadoʼoboʼ. David túuneʼ káaj u gobernar tu noj kaajil Jerusalén.