¿AWOJEL wa baʼax ku tsikbaltik le chan x-chʼúupal tiʼ le koʼolelaʼ? Táan u tʼaan tiʼ Eliseo u profeta Jéeoba yéetel tiʼ le nukuch baʼaloʼob tsʼoʼok u yáantaʼal Eliseo u beetoʼ. Le koʼolelaʼ maʼ u yojel mix baʼal tiʼ Jéeobaiʼ tumen maʼ x-israelitaiʼ. Le oʼolaleʼ koʼox ilik bix kʼuchik le chan x-chʼúupal tu yotoch le koʼolelaʼ.

Le koʼolelaʼ x-siriai. U yíichameʼ Naamán, u joʼolpóopil u soldadoiloʼob Siria. Le sirioʼoboʼ tu palitsiltoʼob le chan x-chʼúupal israelitaaʼ, le oʼolal tiʼ ku meyaj tu yotoch u yatan Naamaneʼ.

Tiʼ Naamaneʼ yaan upʼéel kʼaakʼas kʼojaʼanil ku kʼaabaʼtik lepra. Le kʼojaʼanilaʼ jeʼel tak u beetik u lukʼul u tsʼúutsʼukal u bakʼel máakeʼ. Lelaʼ letiʼe baʼax kiaʼalik le chan x-chʼúupalaʼ: Wa ka páajchajak u bin in tsʼuulil yiknal u profeta Jéeoba tu kaajil Israeleʼ, jeʼel u tsʼakaʼaleʼ. Lelaʼ kʼuch u yojéelt Naamán.

Naamaneʼ u kʼáat utstal, le oʼolaleʼ bin Israel. Ka kʼucheʼ, bin tu yotoch Eliseo. Letiʼ túuneʼ tu túuxtaj u j-meyaj aʼalik tiʼ Naamán ka ichkíilnak siete u téenel ichil u áalkab jaʼi Jordán. Naamaneʼ jach kʼuuxchaji ka tiaʼalaj: ¡Maas jach maʼalob u áalkab jaʼi in kaajal tiʼ tuláakal u áalkab jaʼi Israel! Ka tsʼoʼok u yaʼalik lelaʼ ka binij.

Baʼaleʼ, utúul tiʼ u palitsiloʼobeʼ tiaʼalajtiʼ: In tsʼuulil wa ka u yaʼaltech Eliseo ka beet upʼéel baʼal maas talmeʼ, jeʼel kaʼach a beetkeʼ. Le oʼolaleʼ, ¿baʼaxten maʼ ta beetik le baʼax aʼalaʼabtechoʼ? Naamaneʼ tu yuʼubaj u tʼaan u palitsileʼ ka bin ichkíil siete u téenel ichil u áalkab jaʼi le Jordanoʼ. ¡Ka tsʼoʼok u jóokʼol ichil le jaʼoʼ, u bakʼeleʼ utschaji!

Naamaneʼ jach kiʼimakchaj yóol. Suunaj yiknal Eliseoeʼ ka tiaʼalajtiʼ: Beooraaʼ tsʼoʼok in jach kʼuchul in wojéelteʼ u Diosil Israeleʼ, chéen letiʼ jach yaan u páajtalil tu yóokʼol le Luʼumaʼ. Le beetkeʼ, beet uts a chʼaʼik le baʼax tin taasajtechaʼ. Baʼaleʼ Eliseoeʼ tiaʼalaj: Maʼ, maʼatan in chʼaʼik. Eliseoeʼ yojel maʼ maʼalob ka u chʼaʼa le baʼax ku siʼibiltiʼoʼ, tumen Jéeoba tsʼak Naamán. Baʼaleʼ Giezi (Guehazí), u j-meyaj Eliseoeʼ, u kʼáat kaʼach u chʼaʼe.

Le oʼolaleʼ tu beetaj lelaʼ. Ka bin Naamaneʼ, Guehazieʼ bin áalkabil u chukpachte. Ka tiaʼalajtiʼ: Túuxtaʼaben tumen Eliseo in waʼaltech u kʼáat ka tsʼáa u jaats le siibal tiʼoʼ, utiaʼal u tsʼáa tiʼ jujuntúul uʼulaboʼob táant u kʼuchloʼobeʼ. Letiʼeʼ tuusnaji. Baʼaleʼ Naamaneʼ maʼ u yojliʼ, ka tu tsʼáaj túun tiʼ Giezi u jaats tiʼ le siibaloʼoboʼ.

Ka suunaj Giezieʼ Eliseoeʼ u yojel baʼax tsʼoʼok u yúuchul tumen tsʼoʼok u yaʼalaʼal tiʼ tumen Jéeoba. Ka tiaʼalaj tiʼ Giezi: Tumen ta beetaj le baʼax kʼaasaʼ, u lepra Naamaneʼ tiʼ teech kun páakʼal. ¡Tu séebaʼanil bey úuchikoʼ!

Tiʼ tuláakal lelaʼ, ¿baʼax jeʼel u páajtal k-kankeʼ? Yáaxeʼ, kʼaʼabéet k-tʼaan tiʼ Jéeoba jeʼex tu beetil le chan x-chʼúupaleʼ. Lelaʼ jeʼel u taasik yaʼab utsileʼ. U kaʼapʼéeleʼ, maʼ maʼalob ka k-beetba noj baʼalil jeʼex Naamán kaʼacheʼ, maas maʼalob ka k-beet baʼax kiaʼalik Jéeoba. U yóoxpʼéeleʼ, maʼ maʼalob ka tuusnakoʼon jeʼex tu beetaj Giezieʼ. ¿Máasaʼ yaʼab baʼaloʼob jeʼel k-kanik teʼ Bibliaoʼ?