MAʼILIʼ kíimik Davideʼ tu tsʼáaj tiʼ Salomón u juʼuniloʼob tuʼux ku yeʼesik bix u kʼáat Jéeoba Dios ka beetaʼak u templo. Tu kampʼéel jaʼabil u gobierno Salomoneʼ tu káajsaj u beetik le templooʼ, siete jaʼaboʼob kaʼa tak táankoch tu bisaj u tsʼoʼoksik. Meyajnaj u milesi máakoʼob utiaʼal u beetaʼal le nojoch najoʼ, jach yaʼab taakʼin tu tojoltaj, yoʼolal le plata yéetel oro meyajnaj utiaʼal u beetaʼaloʼ.

Le templooʼ yaan kaʼapʼéel u nojoch cuartoiloʼob, jeʼex le yaan teʼ tabernáculoeʼ. Baʼaleʼ kaʼatéen u maas nuuktakil tiʼ le jeʼeloʼoboʼ. Salomoneʼ tu beetaj u tsʼaʼabal u baʼascheʼi le nuptʼaan teʼ cuarto yaan maas ichil le templooʼ; le uláakʼ baʼaloʼob yanoʼob kaʼach teʼ tabernáculooʼ, tsʼaʼab ichil uláakʼ upʼéel cuartooʼ.

Ka tsʼoʼoksaʼab le templooʼ, beetaʼab upʼéel nojoch kʼiimbesaj. Salomoneʼ xolaj aktáan tiʼe templooʼ ka payalchiʼinaj, jeʼex a wilik teʼ dibujoaʼ. Salomoneʼ tiaʼalaj tiʼ Jéeoba: Wa chichan a tiaʼal le kaʼanoʼ, ¡Bukaʼaj túun maas chichnil le templo a tiaʼalaʼ! Baʼaleʼ in Dios, ken payalchiʼinak le kaaj tu tojil le kúuchilaʼ beet uts a wuʼuyik.

Ka tsʼoʼok u payalchiʼ Salomoneʼ, éem kʼáakʼ teʼ kaʼanoʼ. Ka túun tu tóokaj le baʼalcheʼob tsʼoʼok u kʼuʼubul tiʼ Diosoʼ. Upʼéel sáasil taal teʼ kaʼanoʼ tu sáasilkúunsaj ichil le templooʼ. Leloʼ tu yeʼeseʼ Jéeobaeʼ táan u yuʼubik le payalchiʼoʼ; tu yeʼesaj xan kiʼimak u yóol yoʼolal le templooʼ bey xan yoʼolal u payalchiʼ Salomón. Beooraaʼ le temploaʼ letiʼ u kúuchil tuʼux ku yúuchul adorar, maʼ teʼ tabernáculoʼ.

Salomoneʼ xáanchaj táan u gobernar yéetel yaʼab naʼat, le máakoʼob túunoʼ kiʼimakchaj yóoloʼob. Baʼaleʼ Salomoneʼ tsʼoʼok u beel yéetel yaʼab koʼoleloʼob táantanxel luʼumiloʼob maʼatech u meyajtkoʼob Jéeoba. ¿Táan wa wilik utúul tiʼe koʼoleloʼob táan u kʼubik upʼéel siibal tiʼ utúul beetbil diosoʼ? Ka tsʼoʼokeʼ tu beetoʼob u bin Salomón tu paach yaanal diosoʼob. ¿A wojel wa túun baʼax káaj u yúuchul? Salomoneʼ kʼaschaj u tuukul; beoora túunaʼ le máakoʼoboʼ pʼáat maʼ kiʼimak yóoloʼobiʼ.

Yoʼolal lelaʼ Jéeobaeʼ kʼuuxchaj tiʼ Salomón, ka tiaʼalajtiʼ: Yaan in luʼsiktech le reinooʼ ka in tsʼáa tiʼ yaanal máak. Baʼaleʼ maʼ tu kʼiiniloʼob a kuxtal ken in beetiʼ, tu kʼiiniloʼob u gobierno a paal. Chéen baʼaleʼ, yaan in pʼatik u múuchʼ máakoʼob utiaʼal u gobernarte. Koʼox ilik bix úuchik tuláakal le baʼaloʼobaʼ.