ILAWIL le xiʼipal ku cheʼejtaʼal tumen le máakoʼobaʼ. ¿A wojel wa máaxiʼ? Jeremías, utúul u profeta Dios.

Maʼ jach úuch káajak u xuʼulsaʼal tiʼe beetbil diosoʼob tumen Josías ka yéeyaʼab Jeremías tumen Jéeoba utiaʼal u beet u profetai. Chéen baʼaleʼ, Jeremíaseʼ tu tuklaj jach paal utiaʼal ku beet u profetaileʼ. Baʼaleʼ Jéeobaeʼ tiaʼalajtiʼ yaan u yáantik.

Jeremíaseʼ tiaʼalaj tiʼe israelitaʼoboʼ ka u pʼáat u beetkoʼob baʼaloʼob kʼaastak. Tiaʼalaj xan tiʼobeʼ le u diosoʼob u kajnáaliloʼob le noj kaajoʼoboʼ maʼ jaajil diosoʼobiʼ. Baʼaleʼ yaʼab israelitaʼobeʼ maʼatech u adorarkoʼob Jéeoba, maas ku adorarkoʼob beetbil diosoʼob. Ka aʼalaʼabtiʼob tumen Jeremías yaan u castigartaʼaloʼob tumen Dios yoʼolal le baʼaxoʼob kʼaastak ku beetkoʼoboʼ chéen tu cheʼejtoʼob.

Ku máan kʼiineʼ, Josíaseʼ kíimi. Óoxpʼéel mesoʼob tsʼoʼokokeʼ kʼuch u beetuba reyil Joaquín, u paal. Jeremíaseʼ maʼ tu xulaj u yaʼalik tiʼe kaajoʼ: Yaan u xuʼulsaʼal tiʼ Jerusalén wa maʼ ta pʼatik a beetkeʼex baʼaloʼob kʼaastak. Le j-kʼiinoʼob túunoʼ tu machoʼob Jeremíaseʼ ka joʼopʼ u yawtikoʼob: Jeremíaseʼ kʼaʼabéet u kíimil tumen tsʼoʼok u jach tʼaan kʼaas tiʼ k-kaajal.

Beooraaʼ, ¿baʼax ken u beet Jeremías? ¡Letiʼeʼ maʼ tu chʼaʼaj saajkiliʼ! Tiaʼalajtiʼob: Jéeoba túuxten in waʼalteʼex le baʼaloʼobaʼ. Wa maʼ ta kʼexik a kʼaakʼas kuxtaleʼexeʼ, Jéeobaeʼ yaan u xuʼulsik tiʼ Jerusalén. Baʼaleʼ ojéelteʼex xaneʼ, wa ka kíimskeneʼexeʼ, yaan a kíimskeʼex utúul máak mix baʼal kʼaas u beetma.

U nuuktakiloʼob le kaajoʼ maʼ tu kíimsoʼob Jeremíasiʼ, baʼaleʼ le israelitaʼoboʼ maʼ tu pʼatoʼob u beetkoʼob baʼaloʼob kʼaastakiʼ. Ka túun taal Nabucodonosor u reyil Babilonia baʼatelkoʼob. Ka tsʼoʼokeʼ Nabucodonosoreʼ tu bisaj yaʼabach israelitaʼob tu kaajil Babilonia utiaʼal u palitsiltoʼob. Chéen máans ta tuukul, wa ka bisaʼakech táanxel kaaj tumen máakoʼob maʼ kʼaj óoloʼobeʼ, ¡bix jeʼel a wuʼuykabaeʼ!