Ka tu tsʼáaj le familia Jéeobaoʼ tu pʼataj tu kʼab le taatatsiloʼob u kaʼans u paalaloʼoboʼ (Colosenses 3:20). Letiʼe taatatsiloʼob unaj u kaʼansik tiʼ u paalaloʼob u yaabiltoʼob Jéeobaoʼ, letiʼob xan unaj u kaʼanskoʼob tubeel utiaʼal ka u beetoʼob baʼax maʼalob ken nuukchajkoʼob (2 Timoteo 1:5; 3:15). Tsʼoʼoleʼ kʼaʼabéet u kanik u yil baʼax yaan tu puksiʼikʼal u paalal. Baʼaleʼ maas kʼaʼanaʼan u beetik baʼax maʼalob, tumen maas séeb u kaanbal le paalal yéetel baʼax ku yilkoʼoboʼ. Kʼaʼabéet tiaʼan tu puksiʼikʼaloʼob u Tʼaan Dios utiaʼal ka u kaʼans tubeel tiʼ u paalaloʼoboʼ (Salmo 40:8).

LE BIBLIAOʼ KU YAʼALIK: «Kʼaʼabéet u séeb uʼuyik baʼax ku yaʼalaʼaltiʼ, chéen baʼaleʼ maʼ unaj u séeb tʼaaniʼ» (Santiago 1:19). Le taatatsiloʼoboʼ ku tsʼíiboltkoʼob ka náatsʼak u paalaloʼob tsikbal tu yéeteloʼob. Baʼaleʼ utiaʼal lelaʼ unaj u yeʼeskoʼob u kʼáatoʼob tsikbal tu yéeteloʼob jeʼel baʼalak súutukileʼ. Kaxt junpʼéel maʼalob súutukil utiaʼal a tsikbal tu yéeteloʼob (Santiago 3:18). Wa ku yilkoʼob nakaʼaj a kʼeyoʼobeʼ, maʼ ten u yaʼaloʼobtech mix baʼal. Eʼes chúukaʼan óolal yéetel aʼaltiʼob mantatsʼ a yaabiltmoʼob (Mateo 3:17; 1 Corintios 8:1).

BEET LELAʼ:

• Wa taak u tsikbal a paalal ta wéeteleʼ jóoʼs u tiempoil a wuʼuyikoʼob

• Suukak a tsikbal yéetel a paalal, maʼ chéen pʼis yaan problemaʼobiʼ

LE BIBLIAOʼ KU YAʼALIK: «Le máax yaan u naʼatoʼ u yojel baʼax ku beetik» (Proverbios 13:16). Yaan horaeʼ kex ka tsikbalnakech yéetel a paaleʼ yaan uláakʼ baʼax kʼaʼabéet a beetik utiaʼal a wojéeltik bix u yuʼubikuba. Le táankelmoʼoboʼ u suukileʼ maʼatech u tuklikoʼob baʼax ku yaʼalikoʼob yéetel yaan horaeʼ maʼatech u yaʼalikoʼob u jaajil. «Jeʼel máaxak ku núukik junpʼéel baʼal táanil tiʼ u chʼenxikintikeʼ, minaʼan u naʼat yéetel ku pʼáatal ich suʼtsilil» (Proverbios 18:13.) Le oʼolaleʼ maʼ unaj a jáan tsʼíikiliʼ (Proverbios 19:11).

BEET LELAʼ:

• Kex jeʼel baʼalak ka u tsikbalttech a paaleʼ, maʼ a jáan tsʼíikil yéetel chaʼa u yaʼalik bix u yuʼubikuba

• Kʼaʼajs bix a wuʼuyikaba yéetel baʼaxoʼob kʼaʼanaʼan a wilik kaʼach ta táankelmil

LE BIBLIAOʼ KU YAʼALIK: «In paal, uʼuy u consejo a papá, yéetel maʼ a xúumpʼattik baʼax ku kaʼansiktech a maama» (Proverbios 1:8). Jéeobaeʼ u tsʼaamaj u páajtalil tiʼ le taatatsil yéetel tiʼ le maamatsil utiaʼal u nuʼuktik u paalaloʼ. Tu kaʼatúulaloʼob unaj u kaʼanskoʼobtiʼob u yeʼesoʼob tsiikil yéetel u yuʼuboʼob tʼaan (Efesios 6:1-3). Le paalaloʼoboʼ ku tsʼáaikoʼob cuenta wa maʼ «junpʼéeliliʼ [u] tuukul» le taatatsil yéetel le maamatsiloʼ (1 Corintios 1:10). Utiaʼal ka seguernak u yeʼesaʼalteʼex tsiikil tumen a paalaleʼexeʼ, wa maʼ de acuerdoʼex tiʼ baʼax ka tuklikeʼexeʼ, maʼ baʼateltʼaaneʼex tu táanoʼob.

BEETEʼEX LELAʼ:

• Tsʼáabaʼex de acuerdo tiʼ bix ken a kaʼans a paalaleʼex

• Wa maʼ de acuerdoech yéetel a núup yoʼolal bix ken a kaʼans a paalaleʼexeʼ, ilawil a naʼatik baʼaxten bey u tuukuloʼ

LE BIBLIAOʼ KU YAʼALIK: «Kaʼans le xiʼipal utiaʼal u bin teʼ bej tuʼux unaj u binoʼ» (Proverbios 22:6). Wa a kʼáat a kaʼans tubeel a paalaleʼ kʼaʼabéet a tuklik baʼax ken a beete. Ichil le kaʼansaj ken a tsʼáatiʼoboʼ yaan u kʼaʼabéettal a castigartikoʼob (Salmo 127:4; Proverbios 29:17). Baʼaleʼ ichil le castigooʼ maʼ chéen jaatsʼ táakaʼaniʼ, ichileʼ táakaʼan a wáantik a paalal u naʼatoʼob baʼaxten ka waʼaliktiʼob maʼ u beetkoʼob wa baʼax (Proverbios 28:7). Kaʼanstiʼob u yaabiltoʼob yéetel u naʼatoʼob baʼax ku yaʼalik u Tʼaan Dios (Salmo 1:2). Beyoʼ yaan u yantaltiʼob junpʼéel maʼalob tuukul (HebreoS 5:14).

BEET LELAʼ:

• Áant a paalal utiaʼal ka u creertoʼob yaan Dios yéetel ka u kʼub u yóoloʼob tiʼ letiʼ

• Áant u yiloʼob kʼaʼabéet u kanáantkubaʼob tiʼ baʼaloʼob jeʼel u kʼaskúuntik u tuukuloʼobeʼ, jeʼex Internet wa le redes socialesoʼ. Kaʼanstiʼob u kanáantubaʼob tiʼ le kʼasaʼan máakoʼob chéen ku kaxtikoʼob u violartikoʼob paalaloʼ