K-tsʼáaiktech u diosboʼotikil úuchik a jóoʼsik tiempo utiaʼal a xokik le folletoaʼ, teʼelaʼ ta maas kʼaj óoltaj u j-jaajkunajoʼob Jéeoba, baʼaxoʼob ku beetkoʼob yéetel bix u múuchʼ meyajoʼob. Le baʼaxoʼob ta kanoʼ, k-páaʼtik ka u yáantech a wil chéen toʼon táan k-beetik baʼax u kʼáat Jéeoba teʼ kʼiinoʼobaʼ. Maʼ u xuʼulul a kaanbal tiʼ Dios. Tsikbalt tiʼ a láakʼtsiloʼob yéetel tiʼ a amigoʼob le baʼaxoʼob táan a kanikoʼ bey xan k-invitarkech utiaʼal ka a láakʼintoʼon teʼ tuʼux k-muchʼikba utiaʼal k-kaanbal tiʼ Diosoʼ (Hebreoʼob 10:23-25).

Jeʼex kun bin a maas kaanbal tiʼ Jéeobaeʼ bey xan kun bin a wilik bukaʼaj u yaabiltmilech. Leloʼ yaan u péeksikech a beet tuláakal le ku páajtal utiaʼal a weʼesiktiʼ a yaabiltmaj xan (1 Juan 4:8-10, 19). ¿Bix jeʼel a weʼesik sáamsamal jach tu jaajil a yaabiltmaj Dioseʼ? ¿Baʼax utsiloʼob jeʼel a kʼamik wa ka beetik baʼaxoʼob ku yaʼalikeʼ? ¿Baʼax jeʼel u péeksikech a beet baʼax u kʼáat Dios jeʼex k-beetkoʼ? Le máax kaʼansiktech baʼax ku yaʼalik le Bibliaoʼ jeʼel u yáantkech a wojéelt u núukil le kʼáatchiʼobaʼ, leloʼ yaan u yáantik a familia bey xan teech «utiaʼal ka pʼáatkeʼex tiʼ u yaabilaj Dios [...] bey xan utiaʼal ka yanakteʼex le kuxtal minaʼan u xuuloʼ» (Judas 21).

K-invitartikech a seguert a kaanbal yéetel a xíimbal tu bejil le jaajoʼ. Xok le libro «Pʼáateneʼex tiʼ u yaakunaj Jajal Dios» ka wilik teʼelaʼ.