Juntúul máak móoch u yookeʼ sáamsamal ku kutal kaʼach tu jool le templo u kʼáat caridadoʼ. Juntéenjeakeʼ tu yilaj u kʼuchul Pedro yéetel Juan teʼ templooʼ, ka tu yaʼalajtiʼob: ‹Much tsʼáaʼexten wa baʼax›. Pedroeʼ tu núukajtiʼ: ‹Yaan in tsʼáaiktech junpʼéel baʼal maas maʼalob ke le taakʼinoʼ. Tu kʼaabaʼ Jesúseʼ, ¡líiʼkech ka xíimbalnakech!›. Pedroeʼ tu líiʼsaj le máakoʼ ka joʼopʼ u xíimbal. Le máakoʼoboʼ jach kiʼimakchaj u yóoloʼob yoʼolal le milagroaʼ, ka tu tsʼáaj u fejoʼob tiʼ Jesús.

Chéen baʼaleʼ le sacerdoteʼob yéetel le saduceoʼoboʼ jach pʼuʼujoʼob. Tu machoʼob le apóstoloʼoboʼ ka tu bisoʼob tu táan u nuuktakil le judíoʼob yaan teʼ Sanedrínoʼ. Letiʼobeʼ tu kʼáatoʼob tiʼ le apóstoloʼoboʼ: ‹¿Máax tsʼáateʼex u páajtalil a tsʼakikeʼex le máakaʼ?›. Pedroeʼ tu núukajtiʼob: ‹Jesucristo, le máax ta kíimseʼexoʼ, letiʼ tsʼáatoʼon u páajtalil k-beetik›. U nuuktakil le judíoʼoboʼ tu yawtoʼob: ‹¡Xuʼuluk a tʼaaneʼex tiʼ Jesús!›. Le apóstoloʼoboʼ tu yaʼaloʼobtiʼob: «Toʼoneʼ maʼ tu páajtal u xuʼulul k-tʼaan tiʼ le baʼaxoʼob tsʼoʼok k-ilik».

Ka tsʼoʼok u jáalkʼabtaʼaloʼobeʼ, Pedro yéetel Juaneʼ bin u yaʼaloʼob tiʼ uláakʼ discípuloʼob le baʼax úuchoʼ. Múul orarnajoʼob tiʼ Jéeobaeʼ, ka tu yaʼaloʼobtiʼ: ‹In Yuum, áantoʼon utiaʼal maʼ k-chʼaʼik saajkil tʼaan ta woʼolal›. Jéeoba túuneʼ tu tsʼáaj espíritu santo tiʼob, ka seguernaj u kʼaʼaytajoʼob yéetel u tsʼakikoʼob máak. Bey túunoʼ yaʼab máakoʼob tu tsʼáaj u fejoʼob tiʼ Jesús. Le saduceoʼoboʼ jach pʼuʼujoʼobeʼ ka tu beetaj u kʼaʼalal le apóstoloʼob cárceloʼ. Chéen baʼaleʼ teʼ áakʼaboʼ Jéeobaeʼ tu túuxtaj juntúul ángel utiaʼal u jeʼekʼabtik u joonajil le cárceloʼ. Le ángelaʼ tu yaʼalaj tiʼ le apóstoloʼoboʼ: ‹Xeeneʼex tu kaʼatéen teʼ templooʼ ka kʼaʼaytajnakeʼexiʼ.

Ka sáaschajeʼ bin aʼalbil tiʼ le Sanedrínoʼ: ‹¡Le cárceloʼ chʼotaʼan yéetel llave, chéen baʼaleʼ le máaxoʼob ta kʼaleʼexoʼ minaʼanoʼobiʼ, táan u kaʼansajoʼob teʼ templooʼ!›. Ka bin machbiloʼob tu kaʼatéeneʼ ka bisaʼaboʼob teʼ Sanedrínoʼ. U maas nojchil le sacerdoteʼoboʼ tu  yaʼalajtiʼob: ‹¡T-aʼalajteʼex ka xuʼuluk a tʼaaneʼex tiʼ Jesús!›. Pedroeʼ tu yaʼalaj: «Unaj k-uʼuyik u tʼaan Dios, maʼ u tʼaan chéen máakoʼobiʼ».

U nuuktakil le judíoʼoboʼ jach pʼuʼujoʼobeʼ ka taakchaj u kíimskoʼob le apóstoloʼoboʼ. Gamaliel, juntúul fariseoeʼ, waʼalajeʼ ka tu yaʼalaj: ‹Tukleʼex tubeel baʼax taak a beetkeʼex›. Maʼ xaaneʼ le máakoʼobaʼ táan u yáantaʼaloʼob tumen Dios. ¿Jach wa tu jaajil taak a baʼateleʼex tu contra Dios?›. Letiʼobeʼ tu yuʼuboʼob le baʼax tu yaʼalaj Gamalieloʼ, ka tu jáalkʼabtoʼob le discípuloʼoboʼ. Chéen baʼaleʼ táanil tiʼ u beetkoʼobeʼ tu jaʼajatsʼoʼob yéetel tu yaʼaloʼobtiʼob ka xuʼuluk u kʼaʼaytajoʼob. Le apóstoloʼoboʼ maʼ tu chʼaʼajoʼob saajkiliʼ. Seguernaj u kʼaʼaytajoʼob teʼ templooʼ bey xan joonaj joonajil.