Jéeobaeʼ tu yaʼalaj tiʼ Moisés: ‹Naʼaken teʼ montañaaʼ. Yaan in tsʼáaiktech le jaajay tuunich tuʼux in tsʼíibtmaj in leyoʼoboʼ›. Moiséseʼ naʼakeʼ ka pʼáat 40 días yéetel 40 áakʼaboʼob teʼ montañaoʼ. Le tiaʼan teʼeloʼ, Jéeobaeʼ tu tsʼíibtaj tiʼ kaʼapʼéel jaajay tuunich le Diez Mandamientoʼoboʼ ka tu tsʼáaj tiʼ Moisés.

Ka máan wa jaypʼéel kʼiinoʼobeʼ, le israelitaʼoboʼ tu tukloʼobeʼ maʼ tun suut Moisés. Letiʼob túuneʼ tu yaʼaloʼob tiʼ Aarón: «Beet juntúul dios utiaʼal ka u nuʼuktoʼon». Aaróneʼ tu núukajtiʼob: ‹Taaseʼexten tuláakal le oro yaanteʼexoʼ›. Letiʼ túuneʼ tu yibaj le orooʼ ka tu beetaj junpʼéel imagen de chan wakax. Le kaaj túunoʼ joʼopʼ u yaʼalik: ‹¡Le chan wakaxaʼ letiʼe dios jóoʼsoʼon tu luʼumil Egiptooʼ!›. Letiʼob túuneʼ tu beetoʼob junpʼéel fiestaeʼ ka joʼopʼ u adorarkoʼob. ¿Kʼaas wa le baʼax tu beetoʼoboʼ? Jaaj, kʼaas, tumen le kaajoʼ tu prometertaj u adorartik chéen Jéeoba. Chéen baʼaleʼ beoraaʼ maʼ le táan u beetkoʼobiʼ.

 Jéeobaeʼ tu yilaj le baʼax táan u yúuchloʼ ka tu yaʼalaj tiʼ Moisés: ‹Éemkech ka xiʼikech tu yiknal le kaajoʼ tumen táan u beetkoʼob junpʼéel baʼal jach kʼaas. Táan u adorarkoʼob juntúul maʼ jaajil diosiʼ›. Ka éem Moisés teʼ montañaoʼ u machmaj le kaʼapʼéel jaajay tuunichoʼoboʼ.

Le táan u náatsʼal Moisés teʼ tuʼux yaan le israelitaʼoboʼ tu yuʼubaj táan u kʼaayoʼob. Le ka kʼucheʼ tu yilaj táan u yóokʼotoʼob yéetel táan u adorarkoʼob le chan wakaxoʼ. Moiséseʼ jach pʼuʼujeʼ ka tu pulaj le kaʼapʼéel jaajay tuunichoʼoboʼ, úuchik u beetik lelaʼ kaʼakachpajoʼob. Ka tsʼoʼokeʼ tu xiixkúuntaj le chan wakaxoʼ, ka tu kʼáataj tiʼ Aarón: «¿Baʼax tu beetajtech le kaaj utiaʼal ka a beet u lúubloʼob tiʼ le nojoch kʼebanaʼ?». Aaróneʼ tu núukaj: ‹Maʼ a pʼuʼujul. Techeʼ a wojel bix le kaajoʼ. Letiʼobeʼ u kʼáatoʼob kaʼach juntúul dios, le oʼolal tin píikchʼintaj le oro teʼ kʼáakʼoʼ ka jóokʼ le chan wakaxaʼ›. Aaróneʼ maʼ unaj u beetik kaʼach leloʼ. Moiséseʼ naʼak tu kaʼatéen teʼ montañaoʼ ka tu kʼáat óoltaj tiʼ Jéeoba ka u perdonart le kaajoʼ.

Jéeobaeʼ tu perdonartaj le israelitaʼob tu yuʼuboʼob tʼaanoʼ. Lelaʼ ku yeʼesik kʼaʼabéet kaʼach u chaʼik u nuʼuktaʼaloʼob tumen Jéeoba bey xan tumen Moisés.