Le israelitaʼoboʼ tu kaʼa tuʼubsoʼob Jéeobaeʼ ka joʼopʼ u adorarkoʼob maʼ jaajil diosoʼobiʼ. Chéen baʼaleʼ maʼ kanáantaʼaboʼob tumen le diosoʼob ku adorarkoʼob le ka taal baʼatelbiloʼob tumen u kajnáaliloʼob Ammónoʼ. Bey úuchik u muʼyaj le israelitaʼob ich yaʼab añosoʼ. Le oʼolaleʼ tu yaʼaloʼob tiʼ Jéeoba: «Tsʼoʼok k-kʼebantal. [...] beet uts a salvarkoʼon bejlaʼeʼ». Le israelitaʼob túunoʼ tu xuʼulsoʼob le maʼ jaajil diosoʼoboʼ ka joʼopʼ u kaʼa adorarkoʼob Jéeoba. Letiʼ túuneʼ maʼ páajchaj u seguer u yilik bix u muʼyajoʼobiʼ.

Le israelitaʼoboʼ tu yéeyoʼob juntúul soldado ku kʼaabaʼtik Jefté. Letiʼ kaʼach kun nuʼuktikoʼob ken xiʼikoʼob baʼateʼel yéetel le ammonitaʼoboʼ. Jeftéeʼ tu yaʼalaj tiʼ Jéeoba: ‹Wa ka wáantkoʼon k-ganart le baʼatelaʼ, yaan in kʼubik tiʼ teech le yáax máax kun jóokʼol kʼamken tin wotoch le  kéen suunakenoʼ›. Jéeobaeʼ tu yuʼubaj le baʼax tu kʼáataj Jeftéoʼ ka tu yáantaj u ganart le baʼateloʼ.

Ka suunaj Jefté tu yotocheʼ, le máax yáax jóokʼ kʼamkoʼ u juntúuliliʼ hija. Le ka jóokʼeʼ táan u yóokʼot yéetel táan u paxik u pandereta. ¿Baʼax túun ken u beet Jefté beoraaʼ? Kʼaʼajtiʼ le baʼax u yaʼalmaj tiʼ Jéeobaoʼ, ka tu yaʼalaj: «¡Ay hija! Tsʼoʼok a beetik u yaatal u yóol in puksiʼikʼal tumen tsʼoʼok a kʼuchul a beetaba le máax unaj in túuxtikoʼ». U hija túuneʼ tu yaʼalajtiʼ: ‹Papi, wa letiʼe baʼax ta waʼalaj tiʼ Jéeobaoʼ kʼaʼabéet a béeykuntik. Chéen baʼax kin kʼáatiktecheʼ ka a chaʼa in bin dos meses yéetel in amigaʼob teʼ montañaʼoboʼ. Kéen tsʼoʼokkeʼ kin bin teʼ tabernáculooʼ›. U hija Jeftéeʼ chúukpaj u yóol yéetel meyajnaj teʼ tabernáculo ichil tuláakal u kuxtaloʼ. U amigaʼobeʼ cada año ku bin kaʼach u xíimbaltoʼob tu kaajil Siló.