Uláakʼ u nukuch kaajiloʼob u luʼumil Canaáneʼ tu yojéeltoʼob baʼax úuch tu kaajil Jericó. U reyiloʼob le nukuch kaajoʼobaʼ tu muchʼubaʼob utiaʼal u baʼateloʼob tu contra le israelitaʼoboʼ. Chéen baʼaleʼ maʼ bey tu beetil u kajnáaliloʼob Gabaóniʼ. Letiʼobeʼ tu búukintoʼob nookʼoʼob tsʼoʼok u jach laʼabal, bin u yiloʼob Josuéeʼ ka tu yaʼaloʼobtiʼ: ‹Toʼoneʼ k-taal tiʼ junpʼéel náanach luʼumil. Tsʼoʼok k-uʼuyik u yúuchul tʼaan yoʼolal Jéeoba yéetel yoʼolal le baʼaloʼob tsʼoʼok u beetik ta woʼolaleʼex tu luʼumil Egipto yéetel Moaboʼ. Wa ka prometerkeʼex maʼ kan baʼateleʼex t-éeteleʼ, jeʼel k-meyajtikeʼexeʼ›.

Josuéeʼ tu creertaj le baʼax tu yaʼaloʼoboʼ ka tu yaʼalajtiʼob maʼ kun bin baʼateʼel tu contraʼob. Chéen baʼaleʼ ka máan óoxpʼéel kʼiinoʼobeʼ Josuéeʼ tu yojéeltaj maʼ náach tuʼux u taaloʼobiʼ, baʼaxeʼ tiʼ kajaʼanoʼob Canaáneʼ. Josuéeʼ tu kʼáatajtiʼob: «¿Baʼaxten ta tusoʼoneʼex?». Letiʼobeʼ tu yaʼaloʼob: ‹Tumen sajakchajoʼon tiʼ teʼex. K-ojel Jéeoba a Dioseʼexeʼ táan u baʼateʼel ta woʼolaleʼex. K-kʼáat óoltikteʼex maʼ a kíimskoʼoneʼex›. Josuéeʼ tu beetaj le baʼax tu yaʼaloʼ, maʼ tu beetaj mix baʼal tiʼobiʼ.

Maʼ sen úuch tiʼ lelaʼ, cinco u reyiloʼob Canaán yéetel u soldadoʼobeʼ binoʼob baʼateʼel tu contra le gabaonitaʼoboʼ. Josué yéetel u  soldadoʼobeʼ bul áakʼab xíimbalnajoʼob utiaʼal u bin u defendertoʼob le gabaonitaʼoboʼ. Chéen pʼelak sáaschajik tuláakʼ kʼiineʼ káaj le baʼateloʼ. Le cananeoʼoboʼ káaj u púutsʼloʼob, le oʼolal Jéeobaeʼ tu beetaj u kʼáaxal nukuch bat tu yóokʼoloʼob. Josué túuneʼ tu kʼáataj tiʼ Jéeoba ka u beet maʼ u péek le Kʼiinoʼ. Le Kʼiinoʼ mix juntéen pʼáatak kaʼach maʼ u péek. ¿Baʼaxten tu kʼáataj Josué tiʼ Jéeoba ka u beet leloʼ? Tumen jach confiarnaj tiʼ Jéeoba. Bey túunoʼ le Kʼiinoʼ maʼ tʼúubiʼ. Teʼ kʼiin jeʼeloʼ maʼ áakʼabchaj tak ka ganartaʼab u reyiloʼob Canaán yéetel u soldadoʼob tumen le israelitaʼoboʼ.