Le reina Jezabeloʼ jach pʼuʼuj ka tu yojéeltaj baʼax úuch tiʼ u profetaʼob Baal. Le oʼolal tu túuxtaj aʼalbil tiʼ Elías: ‹Sáamaleʼ yaan a kíimsaʼal jeʼex úuchik tiʼ u profetaʼob Baaloʼ›. Elíaseʼ sajakchaji, púutsʼeʼ ka bin teʼ desiertooʼ. Teʼeloʼ tu yaʼalaj tiʼ Jéeoba: «¡Tak way kin náakleʼ! Beoraaʼ, Jéeoba, luʼs in kuxtaliʼ». Elíaseʼ tumen jach kaʼanaʼaneʼ chilaj wenel yáanal junkúul cheʼ.

Chéen baʼaleʼ juntúul ángeleʼ tu yajseʼ ka tu chaambel aʼalajtiʼ: «Líiʼkecheʼ ka jaankech». Elíaseʼ tu yilaj junpʼéel wóolis waaj yóokʼol choko tuunichoʼob bey xan junpʼéel jarra jaʼ. Ka tsʼoʼok u janal yéetel u yukʼik le jaʼoʼ, ween tu kaʼatéen. Le ángel túunoʼ tu kaʼa ajseʼ ka tu yaʼalajtiʼ: «Líiʼkech ka jaankech, tumen jach náach le viaje ken a beetoʼ». Elías túuneʼ kaʼa jaani. Ka tsʼoʼokeʼ xíimbalnaj 40 kʼiinoʼob yéetel 40 áakʼaboʼob tak ka kʼuch tu montañail Horeb. Le tiaʼan teʼeloʼ ook wenel ichil junpʼéel sajkab. Ka tsʼoʼokeʼ Jéeobaeʼ tu yaʼalajtiʼ: «Elías, ¿baʼax ka beetik wayeʼ?». Letiʼeʼ tu núukajtiʼ: ‹Le israelitaʼoboʼ tu tuʼubsoʼob le promesa tu beetoʼob techoʼ. Tsʼoʼok u nikikoʼob a altaroʼob yéetel u kíimskoʼob a profetaʼob. Beoraaʼ taak xan u kíimskenoʼob›.

Jéeobaeʼ tu yaʼalaj tiʼ Elías: «Jóokʼen ka waʼalakech teʼ montaña tu táan Jéeobaoʼ». Ka taal túun junpʼéel kʼaʼamkach iikʼ, ka tsʼoʼokeʼ tu tíituba le luʼumoʼ yéetel anchaj junpʼéel kʼáakiʼ. Tu tsʼoʼokeʼ Elíaseʼ tu yuʼubaj u chaambel tʼaʼanal. Le oʼolaleʼ tu pixaj u yich yéetel u nookʼeʼ ka pʼáat waʼatal tu jool le sajkaboʼ. Jéeobaeʼ tu kʼáatajtiʼ baʼaxten púutsʼi. Elías túuneʼ tu núukajtiʼ: ‹Tumen chéen teen le profeta pʼaatloʼ›. Chéen baʼaleʼ Jéeobaeʼ tu yaʼalajtiʼ: ‹Maʼ chéen ta juunal yanechiʼ. Tu kaajil Israeleʼ yaan uláakʼ 7,000 u túulal máakoʼob táan u adorarkenoʼob. Xeen a waʼal tiʼ Eliseo tsʼoʼok in yéeyik utiaʼal ka u beet u profetail ta lugar›. Tu séebaʼanileʼ bin Elías u beet le baʼax aʼalaʼabtiʼoʼ. A tuklikeʼ, ¿jeʼel wa xan u yáantkech Jéeoba wa ka wuʼuyik u tʼaaneʼ? Jeʼel u yáantkecheʼ. Beoraaʼ koʼox ilik baʼax úuch teʼ kʼiinoʼob maʼ kʼáax jaʼoʼ.