Jezabeleʼ anchaj juntúul u hija tu kʼaabaʼtaj Atalía, letiʼeʼ jach kʼasaʼan jeʼex u maamaeʼ. Atalíaeʼ tsʼoʼok u beel yéetel u reyil Judá. Le ka kíim le reyoʼ, u hijo káaj u reinar. Le ka kíim xan u hijoeʼ, Atalía káaj u reinar Judá. Utiaʼal maʼ u xuʼulul u reinareʼ, taakchaj u kíimsik tuláakal u paalaloʼob le reyoʼ bey xan jeʼel máaxak ka taakchajak u reinar tu lugar letiʼeʼ. ¡Kʼuch tak u kíims u yáabiloʼob! Le oʼolal sajak kaʼach tuláakal máak tiʼ.

Jeoyadá, u nojchil le sacerdoteʼoboʼ, yéetel Jeoseba, u yataneʼ u yojloʼob jach maʼ maʼalob le baʼax táan u beetik Atalíaoʼ. Le oʼolaleʼ kex jeʼel tak u kíimsaʼaloʼobeʼ tu taʼakoʼob juntúul tiʼ u yáabiloʼob Atalía, u kʼaabaʼ le chaambalaʼ Jeoás. Letiʼeʼ tiʼ nojochkíintaʼab teʼ templooʼ.

Le yaan siete años tiʼ Jeoásoʼ, Jeoyadáeʼ tu muchʼkíintaj tuláakal u nuuktakiloʼob le máaxoʼob ku kananoʼoboʼ bey xan le levitaʼoboʼ. Ka túun tu yaʼalajtiʼob: ‹Kanáanteʼex u joonajiloʼob le templooʼ. Maʼ a chaʼikeʼex u yokol mix máakiʼ›. Ka tsʼoʼokeʼ Jeoyadáeʼ tu tsʼáaj u corona Jeoás utiaʼal ka u beet u reyil tu luʼumil Judá. U kajnáaliloʼob Judáeʼ tu kʼaʼam awtoʼob: «¡Bendecirtaʼak le reyoʼ!».

Ka tu yuʼubaj Atalía u juum u tʼaan le máakoʼoboʼ bin áalkabil teʼ templooʼ. Ka tu yilaj le túumben reyoʼ tu yaʼalaj: «¡Traicioneroʼex!». U nuuktakiloʼob le máaxoʼob ku kananoʼoboʼ tu machoʼob le kʼasaʼan reinaoʼ ka tu bisoʼob u kíimsoʼob. Letiʼeʼ tu péeksaj u maasil u beetoʼob baʼaloʼob kʼaastak. Chéen baʼaleʼ, ¿baʼax kun úuchul beora tsʼoʼok u kíimilaʼ?

Jeoyadáeʼ tu yáantaj u kajnáaliloʼob Judá utiaʼal ka u beetoʼob junpʼéel promesa tiʼ Jéeoba. Letiʼobeʼ tu yaʼaloʼob tiʼ Jéeoba yaan u adorarkoʼob chéen letiʼ. Jeoyadáeʼ tu yaʼalajtiʼob ka u jutoʼob u templo Baal yéetel ka u  xuʼulsoʼob le beetbil diosoʼoboʼ. Utiaʼal ka páajchajak u kaʼa adorartaʼal Jéeoba teʼ templooʼ, tu tsʼáaj sacerdoteʼob yéetel levitaʼob utiaʼal ka meyajnakoʼobiʼ. Tu tsʼáaj xan máakoʼob kanáantik le templooʼ utiaʼal maʼ yokol le máaxoʼob beetik baʼaloʼob kʼaastakoʼ. Ka tsʼoʼokeʼ Jeoyadá yéetel u nuuktakiloʼob le máaxoʼob ku kananoʼoboʼ tu bisoʼob Jeoás teʼ palacio utiaʼal ka kulak teʼ tronooʼ. U kajnáaliloʼob Judáeʼ jach kiʼimakchaj u yóoloʼob tumen jeʼel u páajtal u adorarkoʼob Jéeobaeʼ. Beoraaʼ minaʼan le kʼasaʼan reina Atalíaoʼ yéetel tsʼoʼok u xuʼulul u adorartaʼal Baal. A tuklikeʼ, ¿tu chʼaʼaj wa saajkil Jeoyadá? ¿Ka tsʼáaik wa cuenta tumen maʼ tu chʼaʼaj saajkileʼ tu yáantaj yaʼab máak?